Vini Jr-a'n Spanish passport a nei

Real Madrid forward Vinicius Jr chuan transfer khar aṭanga ni khatnaah Spanish passport a hmu thar a, tun nipui transfer-ah ṭangkai hman tawh lo mah se Spanish club tan chuan chanchin lawmawm a tling.

La Liga-ah hian club tinin non-EU player panga an nei thei a, amaherawhchu matchday squad-ah non-EU player hi pathum zel chauh a hman theih avangin pathum aia tam neih hian awmzia a awm thui lo.

Tun season-ah hian Real Madrid-in Eder Militao, Vinicius Jr leh Rodrygo te chu non-EU player angin an ziak lut. Tunah erawh Vini Jr hian Spanish passport a neih avangin Los Blancos hian non-EU player pakhat an lakluh belh thei ang.

Nipui bazarah khan Real hi Gabriel Jesus nen pawh sawizawm an ni a, amaherawhchu non-EU player vang hian Brazilian forward hi an bawhzui thei ta lo.

Season liam ta kha chuan Vini Jr hi Castilla (Real Reserve team) ah ziahluh a ni a, La Liga-ah hian U23 emaw U25 emaw player zinga professional contract nei chu senior leh reserve team-ah sawn kual theih an ni.

Real Madrid hian Europe khawmualpui pawn player Fede Valverde an kawl. Uruguayan midfielder Valverde hian Spanish khua leh tui nihna a nei a, non-EU player quota a tibuai lo.