Mourinho hnung zui tur Conte?
Chelsea manager Antonio Conte chuan Jose Mourinho hnuaia Blues-in league nomawi an chawi hnu season ang pumpelh a tum thu a sawi lawk a, amaherawhchu Italian manager hi a duh lo zawk kawng zawh theih dinhmunah ding mek.
Pathianni zan dar 8:30 hian Blues-in London Derby-ah Tottenham Hotspur an hmachhawn dawn a, Premier League match Wembley Stadium-a an khelh hmasak ber tur a ni.
Chelsea an buai
Premier League champion Chelsea-in season ṭan hma hauhin chanchin duhawm lo an nei a, manager Conte-a'n nomawi chawi theihna kawnga player pawimawh Diego Costa chhawr zui a tum loh thu a ni.
Buaina hian Blues chhungkuaah nghawng a nei niin a lang a, Conte hote hian league match hmasa berah Burnley chu an mual Stamford Bridge-ah 2-3 in an hneh lo.
Chelsea hian Mourinho hnuaia kum 2014-a league nomawi an chawi zawh khan an match hmasa berah Swansea City nen 2-2 in an inhnehtawk a, an match hnihnaah Manchester City lakah 0-3 in an mualpho bawk. Portuguese manager hian hemi season hian thuthar thehdarhtute kaltlangin club doctor Eva Carneiro a sawisel a, he buaina hian club-ah nghawng a nei a, result a ṭhat loh avangin December thlaa Mourinho ban a ni.
Tun season-a Blues buaina chu Conte leh Costa inkar a ni a, chinfel mai theih a ni tawh lo. Mourinho zawh chiaha Leicester City champion puitu Claudio Ranieri pawh Portuguese manager ang thoin nomawi humhim a tum season-ah ban a ni a, Conte hmabak a thim.
Thim thuah hnih
Italian manager Conte hmabak a thim nachhan nia lang chu fixture fuh lo leh squad chhah tawk lo a ni. Chelsea hian nomawi chawi kawnga an elpui Tottenham an hmachhawn dawn a, Mauricio Pochettino hote hian an match hmasa berah Newcastle 2-0 in an hneh. Hemi zawh hian nomawi duha sum hmang nasa Everton (August 27) an hmachhawn leh nghal dawn a, Premier League champion lai match hmasa pahniha chak lo zawn an awm ngai lo a, tuna erawh Blues hi a zawna vawi thum chak lo thei dinhmunah an ding niin a lang.
Tottenham-in inhliam thar lam an nei lo a, Man City zawmtu Kyle Walker aia chhawr tum Kieran Trippier la dam lo mah se Newcastle lakah rawlthar Kyle Walker-Peters a rintlak. Chelsea tlarhnung tan season liam ta league top scorer Harry Kane, Dele Alli leh Christian Eriksen te chu buaina tham an tling ang.
Chelsea-in Burnley an hneh loh ṭumin captain Gary Cahill chu hnawhchhuah a ni a, English defender hi match thum hrem tur a ni. Spanish midfielder Cesc Fabregas pawhin yellow card vawi hnih a hmuh avangin match khat hrem a ni dawn a, Arsenal captain hluiin Spurs a hmachhawn thei dawn lo.
Inhliam vanga Burnley hmachhawn thei lo Eden Hazard leh Tiemoue Bakayoko ten Chelsea training-na hmun Cobham-ah an inlan tawh a, inkhel bul ṭan tlak erawh an nih a la rinawm loh. Blues-in midfield laiah N'Golo Kante chiah senior player-ah dam ṭha an nei a, kum 19 mi Kyle Scott chu chhawr theihin awm mah se defender David Luiz emaw Andreas Christensen te a chhawr a rinawm zawk. Ngaihtuah tel ngai erawh Conte-a'n captain Cahill thlakna tur a ngaihtuah tel a la ngai tel tih hi a ni.
Kawl a êng
Chelsea tan thu lawmawm hriat tur a awm tho a, hrem hmang zo Victor Moses a inlan thei tawh dawn. Community Shield-a ngalrek ti na Pedro pawh a inlan theih tawh beisei a ni a, Blues ṭantute tana hriat nuam ber chu Premier League club-ah player thar Alvaro Morata a tlangnel nghal.
Spanish forward Morata hian Burnley an hmachhawn ṭumin bench-ah a ṭhu a, goal thum an phur hnuah rawn lutin player pakhata an tlem chungin a pet goal nghal. Hemi hnu hian Blues hi player pahnihin an tlem leh a, Real Madrid forward hlui hian David Luiz-a goal khung tur a siam sak leh bawk.
League champion lai Chelsea hian player pahniha tlem chungin Burnley nuamsaain an chak thei lo a, Stamford Bridge-a an huaisenna hi Wembley Stadium-ah an chhawm a nih chuan Tottenham Hotspur tan mangchhia a ni thei ang.