Pogba puih inhuamtu Matic

Manchester Uni­ted midfielder thar Nemanja Matic chuan khawvel midfielder manto ber Paul Pogba puih a inhuam thu a sawi a, an inkawp rem theih a beisei thu a sawi chhuak.

Vawiin tlai dar 5:00 hian United-in Swansea City hmachhawn turin Liberty Stadium an tlawh dawn a, Jose Mourin­ho-a'n midfield laiah Chelsea midfielder hlui Matic leh Juventus midfielder hlui Pogba te a dah dun leh ngei a rinawm.

Kum 29 mi Matic chuan, "Kan inkawp rem viauin ka hria. Kan inpui tawn a, goal nawr kawngah a ṭha a, tlarhnung a pui tho bawk. Inhnaih takin kan awm dun a, inpui tawn turin kan inpeih reng. Hetianga chhunzawm zel theih hi ka duh a, kan team-a ani anga player ṭha kan kawl hi a lawm a ni," tiin midfield-a kawppui Pobga a fak.

Season liam ta khan Manchester United chuan khawvel player manto ber ni turin Pogba an lalut a, French midfielder hian beisei a pha lo. Tun season-ah erawh Mourinho-a'n French midfielder zalen taka a khelh theih nan tlarhnung pui turin Matic a la lut a, league match hmasa bera West Ham 4-0 zeta an sawp ṭumin Pogba hian goal a khung nghal a, Portuguese manager tan ngaih ṭha taka awmna tham a tling.

United khingpui tur Swansea erawhin chanchin lawmawm an nei thei meuh lo a, an player pawimawh Gylfi Sigurdsson-a'n Everton a pan tawh. Iceland international midfielder Gylfi Sigurdsson thlakna atana pound maktaduai 12-in Hull City midfielder Sam Clucas an dawr a, Tigers hian Sigurdsson an hralhna man zat (£45m) hre ranin an dilna an hnawl sak.

Tun hi Swans ṭhat lai ber ni lo mah se Welsh club hian St Mary's Stadium-ah Southampton lakah point khat an hlawh chhuak a, goal an chhuah lo. Swansea hian United an hmachhawn hnuhnung ber ṭumin Old Trafford-ah point khat an hlawh chhuak bawk. Liberty Stadium-ah United hi talbuai thei reng an ni a, hei vang hian Everton aṭanga Red Devils zawmtu Romelu Lukaku-a'n en bik a hlawh ang.