Coutinho tel loin Reds inlan dawn
Liverpool-in zanin dar 7:30-ah Crystal Palace an lenchilh dawn a, Barcelona nena sawizawm hlawh mek Philippe Coutinho chu a hnungzâng na avanga a la inlan theih loh tur thu coach Jurgen Klopp chuan a sawi.
Kum 25 mi midfielder hi kar hmasa khan Barcelona chuan pound maktaduai 90-a lakluh tumin Reds hi an dawr a, mahse Merseyside club hian inngaihtuah buai loin an hnar nghal. Liverpool-in an player hi zawrh lai a nih loh thu thuchhuah an siam chhunzawm a, a hnu lawkah Brazil international hian chhuah dilna a thehlut thung.
Klopp chuan, "Dinhmun harsa takah kan ding mek a ni. Dawt sawi ka duh lo a, mahse engtiklai pawha 100% thudik sawi reng erawh thil thleng phut phut avangin sawi a harsa ṭhin. Tun dinhmunah erawh Coutinho chungchang kan sawi hnuhnun ber hnuah eng thil mah thleng thar a awm lo a, club hotute nen pawh sawihona kan nei lo," tiin a player pawimawh chu chhuahtir a tum loh hmel hle.
Nilaini khan Barcelona general manager Pep Segura chuan Coutinho an lakluh hnaih thu a sawi a, hei hi chhangin Klopp chuan, "Engatinge mi hian an duh zawng an sawi leh mai ṭhin hi ka hrethiam lo. Coutinho chungchang sawitu tam tak hi chu hriat pawh ka hriat ngai lohte an ni a, a bik takin Pep Segura an tih phei hi chua ka hriat ngai mi a ni lo, a hmuh pawh ka la hmu lo," tiin Barca hotupa a dim duh lo.
Coutinho hian Premier League-a an match hmasa bera Watford leh Champions League playoff-a Hoffenheim an hmachhawn ṭumin a hmel a lan lo tawh bawk. Hetihlai hian Reds tan lawmna tur a awm a, striker Daniel Sturridge chu season bul a ṭan theih loh hnuin Palace hmachhawn turin a dam tawh.