FIFA Awards ; Ronaldo leh Messi bawk an langsar
Football khawvela thuneitu sang ber FIFA chuan Best FIFA Men’s Player 2017 dawng thei tur hming 24 a chhawp chhuak leh ta a, ṭum dang ang bawkin Cristiano Ronaldo leh Lionel Messi chu he chawimawina dawng tura hming chhawpchhuah zinga langsar an ni.
Khawvela footballer manto ber ni tura pound maktaduai 200-a Paris St-Germain zawmtu Neymar chu chhawpchhuah zingah a tel bawk a, Mizote ngaihven Premier League aṭangin player pali Tottenham Hotspur striker Harry Kane, Arsenal forward Alexis Sanchez, Chelsea midfielder pahnih Eden Hazard leh N'Golo Kante te hming a lang bawk.
Real an chungnung
Zinedine Zidane-a enkawlna hnuaiah Real Madrid an vul mek a, thla 19 chhungin nomawi pasarih an chawi tawh - FIFA Awards lamah pawh Real bawk an chungnung a, he chawimawina dawng thei tur hian player pasarih ngawt an thawh - Daniel Carvajal, Toni Kroos, Marcelo, Luka Modric, Keylor Navas, Sergio Ramos leh Cristiano Ronaldo te hming a lang.
Real Madrid dawta awm club chu tudang niloin Barcelona an ni a, Catalan club hian Best FIFA Men’s Player 2017 ni thei turin Andres Iniesta, Lionel Messi, Luis Suarez leh Neymar an thawh - Neymar hi PSG player ni tawh mah se Barca tana a khelh ṭhat vanga a hming hi lang a ni.
Club dang dinhmun
Champions League final-a Real ngam lotu Juventus-in player pathum an thawh a, season hman zawh taka an player pawimawh AC Milan pan ta defender Leonardo Bonucci, Gianluigi Buffon leh Paulo Dybala te hming a lang. Real Madrid leh Barcelona huang chhunga mi tam takin an dah Bayern Munich-in player pathum Robert Lewandowski, Manuel Neuer leh Arturo Vidal an thawh.
Spanish club langsar Atletico Madrid-in Antoine Griezmann bak an thawh thei lo a, club nei loin Zlatan Ibrahimovic awm mek mah se season hmasaa Manchester United tana a khelh ṭhat avangin Swedish striker hi chawimawina dawng thei zingah a hmaing a lang ve bawk.
A hming chu Zidane
France player ropui Zidane-a'n coaching lam a luhchilh hnuah pawh khawvela coach ṭha ho huangah a hming a ziak lut ve nghal a, thla 19 Real a enkawl tawh chhunga a nomawi chawi zat pasarih chu hetih chhunga a chak loh zat match sarih nen a inzat chiah - Best FIFA Men's Coach 2017 chawimawina dawng tura hming 12 chhawpchhuah zingah rin hlawh ber a ni.
Serie A leh Italian Cup-a Juventus champion puitu Massimiliano Allegri, Premier League-a Chelsea nomawi chawipuitu Antonio Conte, Ligue 1-a AS Monaco champion pui a, Champions League semifinal hial hruai thlengtu Leonardo Jardim leh Manchester United tana Europa League leh League Cup chawitu Jose Mourinho-te chu khawvela coach ṭha ber chawimawina dawng tura rinkai pawl an ni bawk.
Chawimawina dang
London khawpuia October 23-a sem tur FIFA Awards-ah hian Best Men's Player leh Best Men's Coach bakah Best Women's Player leh Women's Coach ṭha ber pawh thlan an ni dawn a, Best FIFA Goalkeeper chu a vawi khat nan sem tur niin nominee tihchhuah a la ni lo a, goal khung mawi ber chawimawina FIFA Puskas Award sem a ni bawk ang.
FIFA Fan Award chu sem tur a ni bawk a, he chawimawina hi fans ṭha ber hnenah pek tur a ni - season hmasa khan Liverpool leh Borussia Dortmund fan-te chuan Anfield-a Europa League match an khelh hmain “You’ll Never Walk Alone” chu Hillsborough chhiatna vawi 27-na pualin an sa rual dual dual a, hei vang hian club pahnih fan-te hnenah hian FIFA Fan Award hi pek a ni tawh.
A kalphung
FIFA Awards-a hming chhawpchhuahte hi FIFA Legends hnuaia panel ruatten an thlan chhuah a ni a, awards sem tur aṭang hian player/coach pathum chhawpchhuah leh tur an ni. Mi pathum ṭha bik chhawpchhuak tur hian national team coach, captain leh media mi thlan bik ten vote an thlak ang.
Hei mai hi a la ni lo cheu, fan-ten FIFA Awards chawimawina dawng tur hi vote hmangin an thlang ve thei dawn bawk a, FIFA website http://www.fifa.com-ah vote hi thlak theih a ni dawn. Vote thlak hun hi August 21-ah hawn ṭan a ni ang a, September 7 thleng thlak theih a ni dawn - khawvela player leh coach ṭha ber thlang turin vote i thlak ve thei tihna a ni.
Best FIFA Men's Player 2017
Hming Club/Ram
Pierre Aubameyang (Borussia Dortmund/Gabon)
Leonardo Bonucci (Juventus/Italy)
Gianluigi Buffon (Juventus/Italy)
Daniel Carvajal (Real Madrid/Spain)
Paulo Dybala (Juventus/Argentina)
Antoine Griezmann (Atletico Madrid/France)
Eden Hazard (Chelsea/Belgium)
Zlatan Ibrahimovic (Manchester United/Sweden)
Harry Kane (Tottenham/England)
Andres Iniesta (Barcelona/Spain)
N'Golo Kante (Chelsea/France)
Toni Kroos (Real Madrid/Germany)
Robert Lewandowski (Bayern Munich/Poland)
Marcelo (Real Madrid/Brazil)
Lionel Messi (Barcelona/Argentina)
Luka Modric (Real Madrid/Croatia)
Keylor Navas (Real Madrid/Costa Rica)
Manuel Neuer (Bayern Munich/Germany)
Neymar (Barcelona/Brazil)
Sergio Ramos (Real Madrid/Spain)
Cristiano Ronaldo (Real Madrid/Portugal)
Alexis Sanchez (Arsenal/Chile)
Luis Suarez (Barcelona/Uruguay)
Arturo Vidal (Bayern Munich/Chile)
Best FIFA Men's Coach 2017
Hming Club/Ram
Massimiliano Allegri (Juventus)
Carlo Ancelotti (Bayern Munich)
Antonio Conte (Chelsea)
Luis Enrique (Barcelona)
Pep Guardiola (Manchester City)
Leonardo Jardim (Monaco)
Joachim Low (Germany)
Jose Mourinho (Manchester United)
Mauricio Pochettino (Tottenham Hotspur)
Diego Simeone (Atletico Madrid)
Tite (Brazil)
Zinedine Zidane (Real Madrid)