La Liga an ṭan ta ; Barca leh Real inlan nghal dawn
Nizan khan tun season-a Spanish La Liga match hmasa ber chu Leganes leh Alaves ten an khel ṭan a, result kan hre hman lo. Zanin dar 11:45-ah Atletico Madrid an inlan nghal dawn a, Diego Simeone-a naute hian La Liga kai thar Girona chu khualmualah an lenchilh ang.
Barcelona chu Pathianni zan dar 11:45-ah an inlan dawn a, Real Betis an mikhual ang. Champion lai Real Madrid chu zan dar 1:45-ah an inlan dawn chauh thung a, Zinedine Zidane-a naute hian khualmualah Deportivo La Coruna an lenchilh dawn.
Atletico ngai
Kum 18 hnuai lam player an lak dan dik loh avangin Atletico Madrid-in January 2018 thleng player thar an nei thei dawn lo a, season hmasaa an player neih dan pangngaiin La Liga season bul an ṭan dawn. Nipui transfer laiin Antoine Griezmann chu chhuak tur anga sawithawm ri ring hman viau mah se Atletico-in hremna an tawrh tak avangin a club chu an hun thim ber laia chhuahsan a duh loh thu sawiin a cham chhunzawm a, season hmasa ang bawkin Atletico innghahna a ni leh ang.
Atletico tan Griezmann hian season hman zawh takah league match 36 khelin goal 16 a khung a, assist vawi riat a nei bawk. Nimin club training-ah player inhliam sawi tur an la awm lo a, Diego Simeone-a'n a squad neih ṭhat ber nen Girona a lenchilh thei dawn niin a lang.
Suarez tel lohna
Barcelona-in Spanish Super Cup-a Real Madrid an ngam loh hnuin chanchin lawmawm lo an neih chhunzawm a, hliam vangin Luis Suarez chu thla khat vel an chhawr thei dawn lo. Uruguayan striker hian a khupah hliam a tuar a, Barca coach thar Ernesto Valverde tan hna a hautak sawt dawn tihna a ni - Liverpool striker hlui hian World Cup Qualifier-a Argentina leh Paraguay an hmachhawn hunah pawh ram tan a hmel a lan thei lo ang.
Catalan club hian pound maktaduai 200-a Neymar an hralh chu an tuar niin Real Madrid laka an khelh danah a lang a, Suarez a awm loh leh tak bawk avangin Lionel Messi-a chungah an innghat lehzual sawt ang. Hetihlai hian midfielder Paulinho-a'n Barcelona a zawm fel tawh a, Brazil international inlan dawn leh dawn loh a la chiang lo.
Insiamṭhat hun
Spanish Super Cup-a Real Madrid an ngam loh ṭumin Barca coach Valverde chuan, "La Liga khel tura kan inpeih leh vat a ngai a, team ṭha tak kan nih avangin kan insiamṭha thuai turah ka ngai a ni," tiin a lo sawi tawh a, Real Betis lakah an insiamṭhat leh ṭhat loh a hriat ang.
Barcelona tan Gerard Pique dinhmun a la chiang lo a, Spanish defender hian Real an hneh loh ṭumin a keah hliam a tuar. Inkhelh zawhah, "Barca-a kum kua ka awm hnua Real aia kan hnuaihnung zawka ka vawi khat hriatna a ni," a ti a, Pique thusawi ang hian Real thlazar hnuaia awm reng Barca player-ten an duh lo ang. Super Cup-a a inlan loh hnuah Andres Iniesta chu a inlan theih tawh beisei a ni a, Spanish midfielder hi chakpui tham khawpa thiam a ni tih chu football ngainatu ten an hria.
Zidane-a Real Madrid
Sir Alex Ferguson-a'n nomawi pasarih chawi tura a hun mamawh zat chu thla 90 a ni a, Pep Guardiola-a'n thla 21 a mamawh thung. Zinedine Zidane-a'n nomawi pasarih chawi tura hun a mamawh zat chu thla 19 chauh a ni a, khawvel coach ropui sawi apianga hming lang ṭhin pahnih aiin Zidane-a record a ṭha zawk.
Zidane-a'n nomawi hun belh zel turin zaninah zinkawng a zawh ṭan leh tawh dawn a, Deportivo La Coruna khelmualah a naute hnehna chanpui ngei a tum dawn - La Liga 2016-17 season a Barca aia Real sanna chu point thum chauh a ni a, French manager hian match khat lekin danglamna a thlen theih zia chu a hrechiang khawp ang.
Ronaldo tel loin
Barcelona-in an league match hmasa berah Suarez an chhawr thei dawn lo a, Real Madrid-in Cristiano Ronaldo an chhawr thei dawn bik lo. Hrem vanga match nga khel lo tur forward tel loin Real an la ṭha tawk tih erawh theihnghilh loh a ṭha - Zidane-a'n Super Cup second leg-ah Deportivo an hmachhawn tur hisap ranin Gareth Bale leh Isco-te bench-ah a dan a, zaninah player pahnih hian inkhel bul an ṭan rin a ni.
Super Cup nomawi an chawi hnu lawkah Zidane-a'n, "Super Cup chawi chungin kan season kan khar ta. Tunah chuan kan hmaa nomawi chawi theih pali mitthla chungin bul kan ṭan leh dawn. A awlsam dawn lo tih ka hria a, mah se he chona hmachhawn tur hian kan inpeih," a ti a, zaninah coach sawi anga an inpeih leh peih loh a hriat dawn.