Quarterfinal-ah Muguruza

Wimbledon champion Garbine Muguruza chuan harsatna karah Cincinnati Open quar­terfinal a inhlang kai ta. Hmeichhe player langsar dang Simona Halep leh Johanna Konta te pawhin last 16 an paltlang ve bawk.

Ningani zan inkhelah Muguruza hi Ma­dison Keys lakah 6-4, 3-6, 7-6 (7-3) in a chak hram. Spain nula Muguruza hian hnehna chang turin a khingpuiin match point vawi thum a hmuh tawh chu a pawtthla thei a, vawi li an intawnna a ṭum khat nan hnehna a chang ve hram a ni.

Kum 23 mi Muguruza chuan, "Point hnuhnung ber ka hmuh hma kha chuan chak zawk tur a chiang lo, harsatna kara hnehna ka chang thei hian inrintawkna min pek belh ngei pawh ka beisei hle a ni," tiin a sawi.

Murguruza hian Wimbledon title la tur khan final-ah Venus Williams a hneh a, hemi hnuah hard court tournamnet pathum khel leh tawhin quarterfinal a lut phak vek, mahse nomawi erawh a la chawi belh lo thung.

Inkhel dangah seeded pasarihna Konta chuan a vawi khat nana quarterfinal lut turin Dominika Cibulkova chu 6-3, 6-4 in a hneh ve bawk. Britain nula hian semifinal lut tur chuan Halep a paltlang leh a ngai dawn. Kumin Wimbledon quarterfinal-a intawng tawh player pahnih an insu nawn leh dawn tihna a ni.

Romanian nula Halep hian last 16 paltlang turin Anastasija Sevastova chu 6-4, 6-3 in a hneh a, world number 1 nih theih ngei tumin kawng dik a zawh mek. Cincinnati Open nomawi hi a chawi thei a nih chuan tuma chuhbuai phak lohin ranking-ah a chung ber dinhmun a luah ang.