Parc des Princes-ah Neymar inlan dawn ta

Paris Saint-Germain chuan Pathianni zan dar 12:15-ah Toulouse an mikhual dawn a, khawvela footballer manto ber Neymar chuan PSG khelmual Parc des Princes bika a match hmasa ber a khel ang.

PSG hian season hmasa khan AS Monaco lakah French Ligue 1 nomawi an chan a, laklet tumin thapui an thawh mek, sum an hmang huai hle. Pound maktaduai 200 man Neymar hian a match hmasa bera Guingamp an sawp ṭumin a thiam zia a lantir nghal a, goal a khung bakah assist a nei bawk.

Toulouse hian season hmasa khan PSG hi an mikhual ṭumin an hneh a, khualmualah an inhnehtawk pui thung. Coach Pascal Dupraz chuan, "Chiang taka ka sawi ngam chu kan goal venhim kan tum dawn, tlarhnungah Bus kan park hmiah mai dawn a ni," tiin Neymar a pawlte dan a tum thu a sawi.

Kum 54 mi Pascal chuan sawi chhunzawmin, "PSG hi league champion tura rinkai chu an ni ngei a, mahse chak loh inring saiin kan hmachawn lo ang. Point hmuh tumin an mualah kan lenglut dawn a ni," a ti. Pascal hian PSG player thar Neymar man zat leh a kaihhnawia sum chevel zawng zawng chuan an club chu kum 15 chhung vel a enkawl theih hian a rin thu a sawi tel bawk.