Season thar atan Allegri leh a naute an inpeih

Zanin aṭangin Italian Serie A sea­son thar khelh ṭan a ni dawn a, match hmasa bera atan dar 9:30 hian champion lai Juventus chuan Turin-ah Cagliari an mikhual ang.

Juventus hian a zawnin season ruk chhung Serie A nomawi an chawi tawh a, tun season-ah pawh champion tura rinkai ber an ni leh ang. Tlarhnungah tawnhriat nei ṭha Leonardo Bonucci leh Dani Alves te an chan a, AC Milan aṭangin defender Mattia De Sciglio leh Medhi Benatia te an lalut thung - Arsenal goalkeeper Wojciech Szczesny an nei bawk.

Juve manager Allegri chuan, "Kan khingpui turte an inla ṭha nasa hle a, min elphak tumin theihtawp an chhuah a ni. Keini pawhin kan mamawh player kan neih belh a, a ṭha sa kan neih hnem bawk avangin phur takin season bul kan ṭan thei ang," tiin a sawi.

Italian manager chuan sawi chhun­zawmin, "League champion nih chu kan thil tum langsar hmasa tur a ni a, hetih rual hian Champions League nomawi pawh kan beisei ngam tur a ni ang. Europe-a hlawhtling tur chuan a bul kan ṭan fuh nghal a ngai dawn a ni," tiin a sawi. Juventus CEO Giuseppe Marotta pawhin an squad a chhah ṭhat tawk thu a sawi a, chutih rualin kum dang ai chuan Juve kalkawng hi a harsa deuh tura ngaih a ni.

Italian football bakah Europe thlenga sulhnu ropui hnutchhiah tawh AC Milan-in player 11 an la thar tawh a, season hmasa league-a pahnihna AS Roma bakah Supercoppa Italiana Final-a Juventus hneh hlim Lazio, manager thar Luciano Spalletti kaihhruaina hnuaia insiamrem mek Inter Milan leh Napoli te sawi hmaih theih an ni lo bawk.

Milan hian Juventus aṭangin Bonuc­ci an laksak a, Italian defender bakah hian Andre Silva, Franck Kessie, Hakan Calhanoglu, Ricardo Rodriguez leh Andrea Conti te an neih belh bawk. Vincenzo Montella naute hian Europa League playoff lamah an theihna an pholang tawh. An match hmasa ber atan Pathianni zan dar 12:15-ah Crotone an lenchilh ang.

Pathianni zana Verona hmachhawn tur Napoli hian Chelsea leh Manchester United te chil tiputtu Dries Mertens an chelh thei, season hmasa league match 35 a khelh aṭanga goal 28 khung thei forward hi championship inum boruak ti hot thei tur khawp a tling.

Napoli leh Milan-in player hriam tak tak an kawl ang bawk hian Roma pawhin season hmasa league top scorer Edin Dzeko an la nei a, ani bakah hian Turkey forward Cengiz Under an neih belh bawk. Inrinni zana dar 9:30-a an hmachhawn tur Atalanta lakah point thum hmu thei tura ngaih an ni.