Manchester United an kal fawr

Jose Mourinho hnuaiah Manchester United-in tun season league match hnihah goal li an khung ve ve a, goal an chhuah lo.

Red Devils hian Inrinni zan khan Swansea 4-0 in an sawp a, kum 110 (1907-08) hnua league match hmasa pahniha goal li emaw a aia tam an khung lehna hmasa ber a ni.

United hian August 26 zan dar 10:00-ah Leicester City an hmachhawn ang a, hemi zawh hian international match a awm dawn avangin September 9-ah league match en tur a awm leh chauh ang.

PogBoom
Manchester United-in an match hmasa berah West Ham an sawp a, Mourinho hote an vul. Liberty Stadium-ah erawh Swansea-in goal venhim hna an thawk a, United-in chance ṭha an insiam thei lo.

Swans hian league match hmasa berah Southampton lakah goal an chhuah lo a, United tlarhma zinga nung ber Marcus Rashford-a'n keeper chauh a hmachhawn hnuah Arsenal keeper hlui Lukasz Fabianski a pass! French midfielder Paul Pogba pawhin yellow card a hmuh hnu lawkah ṭul lo takin a khingpui a titlu a, United an talbuai tih a lang.

Amaherawhchu first half injury time-ah Pogba ball tauh chu Fabianski-a'n nam per hman mah se crossbar a per hnua let chu Eric Bailly-a'n a tlawh goal.

Ivorian defender hi African zinga United tana goal khung thei pathumna a ni a, tun hmain Quinton Fortune leh Mame Biram Diouf ten Red Devils tan hian an khung tawh.

Second half-ah United an inringtawk a, inkhel a danglam ṭanna erawh Mourinho-a'n substitution awmze nei a siam hnuah a ni. Minute 75-naah Anthony Martial leh Marouane Fellaini te an rawn inlan a, tlarhma lamah Pogba zalenna pek a ni.

Minute 80-naah tun season-a harhtharna chang Henrikh Mkhitaryan pass chu goal khung tura lakluh Romelu Lukaku-a'n awlsam takin a khung. Minute hnih hnuah Armenian midfielder Mkhitaryan-a pass chu Pobga-a'n cool takin a khung. Minute 84-naah French midfielder Pogba-a'n chak takin ball a lalut a, a hnampui Anthony Martial pein kum 21 mi forward hian United goal lina a khung. Mourinho hote hian minute li chhungin goal thum an khung.

French midfielder Pogba chu United goal li zinga goal thumah a inrawlh a, Nemanja Matic awm hnuah French midfielder ṭhatna a lang chho zel.

Lukaku pawhin Zlatan Ibrahimovic, Anthony Martial, Federico Macheda leh Louis Saha te hnung zuiin United tana league match hmasa pahnihah goal a khung ve ve.

Mourinho a pâwr
Manchester United manager Mourinho chuan, "Kan khelh danah ka lungawi a, hlim takin ka player-ten an khel chhuak a ni. Inkhelh laia ka awm dan enna hun in lo insiam hman a nih chuan ka thusawi dikna hi ka chetziaah ka lantir tih inhmu ang," tiin goal khung har deuh mah se hlauhthawnna a neih loh thu a sawi.

Portuguese manager chuan, "Fing takin, dawhthei takin kan khel a, a hunah tak kan che a ni. Swansea khan tlarhnungah player panga an hmang a, goal an chhuah avangin an khelh dan an thlak a ṭul a, an thlak hun kan ngaichang a, kan hmun awl neih kan hmang ṭha hle," tiin goal an khung tlai chhan a sawi.

Chelsea boss hlui chuan, "Tuna kan team dinhmun sawi­fiah dan ṭha ber chu kan inring­tawk tih hi a ni. Tun dinhmunah chuan kan duh ang zawng vekin thil a kal a, amaherawhchu hetiang reng hi a ni thei dawn lo. Kawng harsa zawh hun a la awm ang," tiin chak reng a harsat tur thu a sawi.