Palace ngamtu Mane

Liverpool-in Premier League match hnih an khelhnaah hnehna an chang ve ta - an match hmasa bera Watford an inhnehtawkpui hnuah Crystal Palace chu 1-0 in an hneh a, Anfield-a goal awmchhun khungtu hi Sadio Mane a ni.

Palace coach thar Frank de Boer hnuaia an match hmasa bera 3-0 a Huddersfield ngam lotu Palace khelh danah hmasawnna hmuh tur a awm nachungin tlarhnung a la phui ṭha chuang lo a, an hun neih ṭhat berah Reds striker hlui Christian Benteke chuan yard riat vel leka hla aṭangin a hlah.

Liverpool-in Cham­pions League playoff an khelh avangin Jurgen Klopp-a'n squad a sik­sawi nual a, Andrew Robertson chuan Reds tan competitive match hmasa ber khelin a khel ṭha hle - Hull City

aṭanga lakluh left back hian Joel Matip leh Mane tan goal khungna remchang a siam sak a, player pahnih hian an hming chher nan an hmang thei lo.

Reds tan Daniel Stur­ridge chuan inkhel bul a ṭan bawk a, Mohamed Salah aia lut English striker hian goal khung lo mah se a thiam ngaiin a la thiam reng tih hmuh turin a awm.

Liverpool manager Jurgen Klopp chuan, "Game harsa tak a ni a, first half-ah khan kha aia ṭha zawka khel thei tur chu kan ni. Kan tlarhnung a phui ṭha em em a, 85% ball kan chang ang maiah ka ngai hial. Goal khung tur chuan thutlukna dik siam a ngai a, mah se first half-ah khan chu chu kan ti lo. Kha aia tam zawk goal khung thei kan ni a, mah se kan chak avangin ka lawm tho a ni," tiin a sawi.