India tan 'Singh' an zai
Hero Tri-nation International Football series match hmasa ber chu Inrinni zan khan Mumbai Football Arena-ah khelh a ni a, India chuan 2-1 in Mauritius an hneh.
Bengaluru FC-in AFC Cup an khelh hnaih avangin Bangalore club player-te India tan an inlan thei lo a, captain Sunil Chhetri awm loh hlana captain armband hrengtu chu Sandesh Jhingan a ni.
India tan tlarhmaah Mizo tlangval Jeje Lalpekhlua chu innghahna a ni a, Hnahthial tlangval thlawp tur hian Robin Singh chuan inkhel bul a ṭan bawk. Mizo rawlthar duhawm Jerry Lalrinzuala'n inkhel bul ṭan lo mah se minute 85-naah tlan luhtir a ni a, Lalruatthara tan hmun a la awm rih lo thung.
Inkhel ṭan aṭanga minute 15-na lekah rin loh zawk mikhual team-in goal an khung a, Mervyn Jocelyn chuan Mauritius hmahruaina goal hi a khung. India-in awlsam taka tlawm an tum lo. Minute 37-naah tun hnaia sawisel hlawh tak Robin Singh a inlar a, Rowllin Borges ball pek ṭha tak chu um lutin Atletico de Kolkata striker tharum ngah hian goal-ah a chantir.
Goal dang lut loin chawlhlawk hman chhunzawm a ni a, Robin Singh lachhuakin second half-ah Balwant Singh luhtir a ni. India tan a vawi hnih inlannaah Balwant-a'n senior team tana khelh a phuzia a pholang a, minute 62-naah chakna goal a khung - Punjabi striker goal khungna kawngah Jeje hmuh hmaih theih a ni lo a, season hmasaa Mohun Bagan tana a khelhpui Balwant-a goal khung tur hi 'class' zetin a siamsak.
India-in an match hnuhnung 16-a vawi 14 an chakna inkhelah hian Nikhil Poojary, Amrinder Singh leh Manvir Singh ten ram tana an match hmasa ber an khel. Manvir Singh hi kum tira Santosh Trophy-a Mizoram hnehtu West Bengal-a an striker kha a ni a, a thleng sang chak hle.
Tri-nation series match hnihna chu August 22 zan khian St Kitts & Nevis leh Mauritius ten an khel leh ang a, August 24-ah India hian St Kitts & Nevis an inkhel ang,.