Reds-in Barca an hnar leh ta

Barcelona-in Philippe Coutinho lakluh an tumna an la bansan lo a, an dinna ngaiah Liverpool an ding reng bawk. Catalan club hian Zirtawpni zan khan a vawi thum nan Reds an dawr nawn a, an sum phal zat hi pound maktaduai 114 a ni.

Mahse, chiang taka Coutinho chu zawrh lai a nih loh thu lo sawi tawhtu Liverpool-in an ngaihdan an la thlak lo a, Brazil international hi hralh an tum lo tih an lo sawi tawh nemngheh nan Barca an hnar. Reds hian kar hmasa lawk khan Barcelona-in pound maktaduai 90-a Coutinho lakluh an tumna chu an lo hnar tawh.

Liverpool tan match 182 a khelha goal 42 khungtu Coutinho hian Barca-in an dawr vawi hnihna hnar a nih hnu lawk­ah Reds hnenah hian chhuah dilna a lo thehlut tawh a, hetichung hian Liverpool hian hralh tumna an la nei chuang lo.

Barcelona general manager Pep Segura chuan Coutinho an lakluh hnaih tawh thu tun hnaiah a sawi a, mah se Crystal Palace an hmachhawn hmaa media ho a kawmnaah Reds boss Jurgen Klopp chuan, "He thu sawitu hi a hmuh pawh ka la hmu lo," tiin Barca chu an ṭawng ve mai mai niin a sawi.

Catalan club hian Paris St-Germain lakah pound maktaduai 200-a Neymar an hralh hnuin player dang an melh mek a, a hlawhtlinna erawh an la hmu thei lo. Coutinho hian January khan An­field-ah kum nga dang cham turin contract a lo ziak tawh a, a contract-ah hian release clause a awm lo.