Arsenal ngam loh Jese Rodriguez

Stoke City khelmual aṭangin Arsene Wenger a naute kut bengin an haw a, an ngam loh chu Real Madrid forward hlui Jese Rodriguez a ni.

Inrinni zan Premier League inkhelah Arsenal chu Stoke lakah 0-1 in an chak lo a, an goal khung pawmsak an nih ve loh avangin Wenger-a'n a lungawi loh thu a sawi nasa hle.

Goal khat a tawk
Mark Hughes-a'n Nilaini khan Paris St-Germain aṭangin Jese chu loan hmangin a lalut chauh a, Bet365 Stadium-ah Gunners hmachhawn turin bul a ṭantir nghal. Kum 24 mi Jese hian second half ṭan aṭanga second 90 lekah Saido Berahino-a pass chu angle zim zet aṭangin goal awmchhun a khung a, a match hmasa berah a club thar tan point thum a pet chhuak nghal.

Europa League khel tur Arsenal hian an player manto ber Alexandre Lacazette hmang­in minute 72-naah an siphurh an sut niin an inngai. Mahse, referee Andre Marriner-a'n ngaihdan dang a nei, Lyon striker hlui hi offside nia ngaiin a goal khung hi pawm a ni lo, replay ennawn a nih hnuah France international ke hi tlem chuan a pawng deuh niin a lang.

Arsenal hian an si phurh sut tumin striker Oliver Giroud, Theo Walcott leh Alex Iwobi te luhtir mah se, Potters keeper Jack Butland a chetsual duh miau loh avangin danglamna an thlen zo tawh lo. Kum 2009-10 season hnu lama a zawna league match hmasa pahnihna hnehna chan an beiseina chu a thamral a, an match lehpekah Liverpool an hmachhawn zui dawn avangin intuaihriam nghal an mamawh ang.

Wenger a lawm lo
Gunners manager Wenger chuan, "Goal pangngai tak kan khung, a endiktu lam tan pawh thutlukna harsa lo tak tur niin a lang," tiin Lacazette goal khung chungchang a sawi a, penalty an hlawhchhuah loh avangin French pachak hi a lungawi lo hle bawk.

Arsenal wing back Hector Bellerin chu box chhungah Stoke forward Mame Biram Diouf-a'n a ti tlu a, Spain international hian penalty a hlawhchhuah beisei hle mah se pek a ni lo.

Kum 67 mi Wenger chuan, "Season hmasa aṭang tawh khan penalty kan hlawhchhuah tur ngei nia lang pawh pek kan ni lo fo, chutihrualin kan chawi thei em em thung si," tiin referee-te thutluknaah a lawm lo hle. Season hmasa khan Arsenal hian league match 38 aṭangin penalty vawi 10 an chawi a, anmahni aia chawi hnem chu Hull City (13) chiah an ni.

Jese thar
Kum 24 mi Jese hi a rawl­thar chhuahtirh chuan Real Madrid academy chhuak zinga beiseiawm ber pawl a ni. Kum 2014 World Cup hma deuh khan Real leh Schalke nen an inhmachhawn ṭumin tuna Arsenal defender nita Saed Kola­sinac hian a khupah a hliam sak a, hemi hnuah beisei angin a ṭha zui ta lo niin a lang.

Real Madrid aṭang hian Paris Saint-Germain a zawm a, match hnih bak a khel hman lo. Season hmasa khan Las Palmas lamah loan hmanga kalin match 16 a khelhah goal thum a khung a, tun season chhung chu Stoke tan a khel ang.

Kum bithliah inelna hrang hranga Spain tana khel tawh Jese hian Potters tana a match hmasa berah goal a khung a, goal awmchhun a khung bakah Gunners tlarhnung a chhaih buai thei hle.

Potters boss Hughes chuan, "Jese theihna sanzia kha fans lam hmuh chak a ni a, an duh ang ngeiin danglamna a thlen. Hun reilote chhung training ṭha takin a nei hman a, a theihna ka hmuh khan chawlhtir phal chiah ka ngai lo," tiin a sawi.

Goal rang ber
Inrinni zan Premier League inkhel dangah Leicester City tan forward Shinji Okazaki chuan inkhel ṭan aṭanga second 60 pawh a liam hmain Brighton lakah goal a khung a, tun season-a goal rang ber a ni. Foxes tan Harry Maguire chuan a club tana a goal hmasa ber khung bawkin si hnih faiin hnehna an chang.

Inkhel dangah Manchester United striker hlui Javier Her­nandez-a'n West Ham tana a match hnihnaah goal hnih khung mah se Southampton lakah a team a chakpui zo lo. Minute 33-naa Mauricio Pellegrino hnawhchhuah a nih vanga player 10 a khel tluan Hammers hi Saints lakah 3-2 in an tlawm.

An match hmasa zawka Bour­ne­mouth si khat faia hnehtu West Brom chuan substitute Hal Robson-Kanu goal khat hmangin Burnley 1-0 in an hneh. Robson-Kanu hi minute 63-naah khelmualah a rawn tlan lut a, minute 71-naah goal khungin, goal a khung aṭanga minute 12 a liam hnuah Matt Lowton laka a chetmawi loh avangin hnawhchhuah a ni.

Inrinni Zan Inkhel Results
Swansea 0 - 4 Manchester United
Bournemouth 0 - 2 Watford
Burnley 0 - 1 West Brom
Leicester City 2 - 0 Brighton
Liverpool 1 - 0 Crystal Palace
Southampton 3 - 2 West Ham United
Stoke City 1 - 0 Arsenal