Vawiin aṭangin Badminton inelna lian

World Badminton Championship chu vawiin aṭangin Glasgow, Scotland-ah khelh ṭan a ni dawn. Kumin badminton inelna lianah hian Indian shuttler langsar Kidambi Srikanth, PV Sindhu leh Saina Nehwal te an inlan dawn. Inkhel hi Star Sports Select 1-ah live a ni ang.

Rio Olympic silver me­dalist Sindhu-i'n 2013 leh 2014 khan world championship-ah hian bronze medal a la tawh a, kuminah India Open a lak theih bawk avangin beiseina a nei sang hle. Sindhu hi first round-ah a bye dawn a, Kim Hyo Min leh Hadia Hosny te inkhela a chak zawk a hmachhawn ang, a chak chho zel a nih chuan quarterfinal-ah China star Sun Yu nen an inhmachhawn dawn a ni.

World number 1 hlui Saina pawh first round-ah a bye dawn. London Olympic bronze medalist hian Sabrina Jaquet leh Natalya Voytsekh te inkhel a chak zawk a hmachhawn dawn a, a chak a nih chuan last 16-ah seeded pahnihna Sung Ji Hyun nen an intawng ang.

Tun hnaia result nei ṭha tak Srikanth hi tun ṭumah chuan India mipa zinga medal dawn beiseina sang ber a ni ang. Srikanth chuan, "Ka fit ṭha a, ka inringtawk hle. Chutihrualin player dang zawng zawng pawh ṭum dang zawng aiin an ṭang zual dawn a, inelna nuam leh hautak tak a ni ang," tiin a sawi.

Mipa world number 1 Son Wan Ho, legend pahnih Lee Chong Wei leh Lin Dan bakah Olympic champion Chen Long leh Viktor Axelsen te an inlan vek dawn avangin mipa inelna hi a boruak a sang dawn hle tih a chiang.