Nadal zinkawng a tawp

US Open inbuatsaihna tournament pakhat Cinci­nnati Open quarterfinal-ah Rafael Nadal chu Australia tlangval Nick Kyrgios lakah 6-2, 7-5 in a chak lo. Zirtawpni zan inkhelah Nadal hi chak lo mah se Andy Murray leh Roger Federer te an inlan ve theih loh avangin world ranking chhuak tharah chuan number 1 a ni dawn tho.

Grand Slam vawi 15 champion tawh Nadal chuan, "Chhuanlam tur a awm lo, ka khel ṭha tawk lo a ni. Ṭha taka ka khel a nih loh chuan Nick te ang player ṭha lakah chuan hnehna chan theih a ni lo," tiin a sawi.

Inrinni zan khan semi­final khelh chhunzawm niin Kyrgios hian David Ferrer 7-6 (7-3), 7-6 (7-4) in a hneh zui a, final a lut. Semifinal inkhel lehlamah Bulgaria star Grigor Dimitrov chuan John Isner 7-6 (7-4), 7-6 (12-10) in a hneh ve thung, nizan khan final khelh a ni a, he thu buatsaih lai hian result kan hre hman lo.

Nizan vek khan hmei­­chhe inlena lamah Si­mona Halep leh Wim­bledon champion Garbine Muguruza ten nomawi an inchuh bawk a, Romanian nula Halep hi a chak a nih chuan world number 1 thar a ni ve bawk ang.