Bayern player thar che ṭha nghal
Bundesliga champion Bayern Munich-in nomawi humhim turin an match hmasa berah Bayer Leverkusen chu 3-1 in an sawp a, player thar Niklas Sule leh Corentin Tolisso ten goal an khung nghal. Season liam taa Bayern top scorer Robert Lewandowski pawhin penalty aṭangin Bayern goal thumna a khung a, goal khung tam lama Polish striker elpui Gabon striker Pierre-Emerick Aubameyang pawhin Borussia Dortmund-in Wolfsburg 3-0 a an hneh ṭumin a pet goal ve bawk.
Mi thar tlangnel
Zirtawpni zan inkhelah Hoffenheim aṭanga Bayern zawmtu Sule leh Sebastian Rudy ten Carlo Ancelotti hnuaiah inkhel bul an ṭan nghal a, German midfielder Rudy hian minute 9-na lekah Sule goal khung tur a siam sak.
Kum 27 mi Rudy hi Supercup-a Borussia Dortmund an hneh ṭumin goal hnuhnung pahnihah a inrawlh a, Bavarians tan hmun pawimawh a chhang chho ang.
Bayern tana mi thar inlan dang Corentin Tolisso chuan league match hmasa berah goal a khung ve nghal bawk. Kum 23 mi Lyon aṭanga Bavarians zawmtu Tolisso hi French player zinga Bayern tana match hmasa bera goal khung nghal thei hmasa ber a ni a, Franck Ribery pawhin he record duhawm tak hi a tithei lo.
Kum 2007 khan Bayern player thar Miroslav Klose leh Luca Toni ten an match hmasa berah goal a khung nghal a, tun ṭum hi hemi hnua player thar pahnihin match hmasa bera goal an khung leh nghalna hmasa ber a ni.
Bayern tan Lewandowski-a'n goal a khung bawk avangin an goal nawr dan chu Italian manager Carlo Ancelotti tan a lungawi thlak a, an tlarhnung erawh inenfiah a ṭul hle. Allianz Arena-ah Leverkusen-in Admir Mehmedi hmangin minute 63-naah goal an khung a, inhliam vanga Bayern defender pahnih Jerome Boateng leh Javi Martinez te awm loh a lang.
Italian manager Ancelotti chuan, "Hmunruak kan pe nasa lutuk a, insiamṭhat kan mamawh a ni. Goal kan khung hma a, kan tlarhnung a phui loh avangin inkhel harsa tak a ni," tiin insiamṭhat an mamawh thu a sawi.
Gotze a kir
Borussia Dortmund-in VFL Wolfsburg 3-0 in an hneh a, damlohna vanga thla kaw chhung inlan tawh lo Mario Gotze chu a vawi khat nan a inlan.
Kum 25 mi Gotze hian minute 22-naa Christian Pulisic goal khung tur a siam sak. Hemi hnu hian Marc Bartra leh Pierre-Emerick Aubameyang ten goal an khung leh bawk.
Inkhelh banah Gotze chuan, "Ka dam leh tawh a, amaherawhchu 100% fitness nei tur chuan hun ka la mamawh khawp ang. Ka thawhrim a ṭul a, hna thawh tur ka la ngah a ni," tiin a sawi.
Hoffenheim chak
Champions League playoff-a Liverpool laka chak lo Hoffenheim-in league match hmasa berah Werder Bremen 1-0 in an hneh a, goal awmchhun hi Andrej Kramaric khung a ni.
Croatian striker Kramaric hian Liverpool lakah penalty hlah mah se bench aṭanga tlan lutin Bundesliga-a vawi 50 a inlanaah goal a khung. Hoffenheim hian August 23 zan dar 12:15 khian Anfield-ah Liverpool nen Champions League khelh inchuhin an inhmachhawn ang.
Leipzig chak lo
Season liam taa pahnihna RB Leipzig chuan league match hmasa berah Schalke 2-0 in an hneh lo. Royal Blues player thar Nabil Bentaleb-a'n goal a khung nghal a, Yevhen Konoplyanka-a'n a khung belh leh bawk.
Leipzig hian inkheltir lamah inkhel an thunun a, Liverpool nena sawi zawm Naby Keita hmangin midfield an thunun. Amaherawhchu, FIFA Confederations Cup-a Germany champion puitu Leipzig forward Timo Werner chuan European U21 champion team zinga mi Thilo Kehrer leh Schalke defender ten chetna hun an siam lo.
Inkhel Results
August 18, Zirtawpni
Bayern Munich 3 - 1 Bayer Leverkusen
BAY : Sule 9'; Tolisso 19'; Lewandowski 53' (P)
LEV : Mehmedi 65'
August 19, Inrinni
Hoffenheim 1 - 0 Werder Bremen
HOF : Kramaric 84'
Hertha BSC 2 - 0 Stuttgart
HER : Leckie 46', 62'
Hamburger SV 1 - 0 Augsburg
HAM : Muller 8'
Mainz 05 0 - 1 Hannover 96
HAN : Harnik 73'
Wolfsburg 0 - 3 Borussia Dortmund
BOR : Pulisic 22'; Bartra 27'; Aubameyang 60'
Schalke 04 2 - 0 RB Leipzig
SCH : Bentaleb 43' (P); Konoplyanka 73'