Valencia-ah Paulista a kal

Arsenal defender Gabriel Paulista chu tun hma lama a tlangnel tawhna la Liga lamah a kir leh. Kum 26 mi Paulista hi a club hlui Villarreal tan ni loin Valencia tan a khel tawh thung dawn a, kum nga daih contract a ziak.

Brazilian centre back hian kum 2015 January thla khan pound maktaduai 11-in Emirates Stadium a pan a, Gunners tan hian match 64 khelin FA Cup vawi hnih a chawi pui hman.

Arsenal hian tlar­hnung lamah Laurent Koscielny, Per Mer­tesacker, Shkodran Mustafi leh Rob Holding bakah Sead Kolasinac, Nacho Monreal leh Calum Chambers te an nei bawk - Paulista hian inkhelh tam theihna tur hmun nia a ngaih a pan.

Thuchhuah siamin Gunners chuan, "Gabriel-a'n kan club tana a tha thawh zawng zawng avang khan lawmthu kan sawi a, La Liga club Valencia tan pawh player pawimawh tak a nih ngei kan beiseiin duhsakna kan hlan," tiin a sawi. Valencia hian Inter Milan aṭangin defender Jeison Murill chu loan hmangin kum hnih chhung atan an lalut bawk.