Atletico an tawlhthlu nghal

Inrinni zanah Atletico Madrid-in tun season-a an La Liga match hmasa ber an khel a, kai thar Girona lakah an mualpho, 2-2 in an inhnehtawk. Atletico Madrid-in goal hnih an chhuah hnuah Antoine Griezmann hnawhchhuah a ni a, mah se an thiampuipa awm loh hnuah Atletico-in an si phurh an sut zo.

Girona khelmuala inkhelah Cristhian Stuani a langsar a, Middlesbrough forward hlui hian minute 22-na lekah goal hmahruai a khung. Kai thar club-in an goal hnihna khung turin hun an duh rei lo, goal hmasa ber an khung aṭanga minute thumnaah Stuani bawk a inlar a, Uruguayan striker hian a goal hnihna a khung - Atletico an hawihai.

Goal dang lut loin chawlhlawk hman a ni a, second half-ah Atletico ṭha zawk kan hmu. Mahse, Manchester United nen sawizawm a nih hnua player lalut thei lo tura Atletico hrem an nih avanga Spanish Club-a cham thlang Griezmann chu a tluk der avangin yellow card pek a ni a, yellow card a hmuh hnuah referee a tawn nasat avangin hnawhchhuah zui a ni.

Atletico-in goal hnih an chhuah tawh a, an thiampuipa an chan bawk avangin chak lo tur chiangah dah an ni. Mahse, Griezmann awm loh hnuah Atletico an ṭang sawt a, minute 78-naah an goal hmasa ber an khung. Substitute Angel Correa chuan yard 18 vela hla aṭangin an si phurh sut ṭhenna goal hi a khung.

Diego Simeone-a nauten huaisen takin an beih chhunzawm a, hun tawp nan minute nga chauh a awm tawh tihin Jose Maria Gimenez chuan an si phurh sut zawhna goal a khung - mah se injury time-ah Girona zawkin Olarenwaju Kayode hmangin chance ṭha an nei leh a, Atletico keeper Jan Oblak chet ran zarah season hmasaa pathumna club hi an him.

Atletico boss Simeone chuan, "Goal hnih chhuah a, player pakhat kan chan bawk avangin mi tam zawkin kan thawh leh an ring tawh lo. Mahse, kan beidawng ve ngai lo a, thil theih loh nia lang chu tiin result kan hlawh chhuak a ni," a ti a, La Liga match 253 a khelh tawha a vawi khat nana hnawhchhuah tawktu Griezmann chungchang erawh a sawi thui duh lo.

Inkhel Results
Leganes 1 - 0 Deportivo Alavés
Valencia 1 - 0 Las Palmas
Celta de Vigo 2 - 3 Real Sociedad
Girona 2 - 2 Atlético Madrid
Sevilla 1 - 1 Espanyol