MPL9 kan nghak chhuak ta

Zote Honda Mizoram Premier League Season 9 ṭan nan champion lai Aizawl FC leh coach record nei ṭha Lalsangzuala Hmar enkawl Chawnpui FC te an inkhel dawn. Inkhelh hun hi chhun dar 12:00 a ni a, inkhelhna hmun hi RG Stadium a ni.

I Day Football neih zawh takah khan Aizawl FC hian 2-1 in Chawnpui FC hi an hneh a, I League club hi vawiinah pawh chak zawk tura rinkai an ni ang. Amaherawhchu Chawnpui coach thlir dan a dang a, Aizawl FC chu an hmachhawn châk ber a nih thu a sawi.

Chawnpui hian Mizo striker langsar pahnih MC Malsawmzuala leh Lalliansanga (Notea) te an lalut a, MC-a leh Notea te hian training la nei tam lo mah se Aizawl FC lakah khelh hun an neih ngei a rinawm. Inhliam vanga I Day Football-a inlan thei lo Lalsawmzela a dam ta bawk a, Chawnpui an ṭha sawt ang.

Chawnpui coach Lalsangzuala Hmar chuan, "I Day Football-ah kan tlarhnung a phui a, tihsual ho te te kan nei. Chumi siamṭha tur chuan theihtawp kan chhuah a, kan training-in awmzia a nei em, tih chu AFC hmaah kan thlir dawn a ni," tiin inkhel tura an inpeih tawh thu a sawi.

Aizawl FC-in I Day Football final-ah Mizoram Police an hneh lo a, MPL-ah champion ngei tumin tawnhriat nei ṭha defender Lalchhawnkima an lalut. Inter Village 2022 champion Champhai Kanan captain Kim Kima hian a khelh tawhna ṭhin AFC-ah pawh captain hna a chelh leh dawn.

Mizo club hian coach atan Standly Rosario an lakluh thu an puang tawh bawk a, amaherawhchu East Bengal leh Mohun Bagan enkawl tawhtu coach hian Aizawl a rawn la thleng lo. MPL match hmasa berah coach Lalrozama Fanai hoin bul an ṭan dawn a, I League club hian MPL9 nomawi an chawi thei a nih chuan a zawna vawi thum champion thei hmasa ber an ni ang.

AFC coach Rozama Fanai chuan, "Kan squad a chhah ṭha a, player thlan pawh a har dawn. Under 18 dan awm hian ngaihtuah tur a ti tam bawk. Chhawnkima'n bul a ṭan dawn a, a bak chu inkhelh hunah in hre thei ang. Chawnpui coach Sanga hi a ṭha a, mahse team ṭha zawk kan ni a, chak ngei kan tum ang," tiin Vanglaini a hrilh.

Aizawl FC hi MPL ṭan hma khan Hnahthialah an zin a, Hnahthial DFA XI chu 6-0 in an sawp. Coach Rozama'n training-naa khel ṭha bul a ṭantir ṭhin a, Chawnpui laka bul ṭan tur pawh hriatthiam a har hle.

En châkawm Police Vs Chhinga Veng
Vawiin tlai dar 3:00 hian Mizoram Police leh Chhinga Veng te RG Stadium-ah an inkhel dawn. I Day Football champion Police hi MPL9 champion tura rinkai an ni pha a, coach Lalbiaksanga Colney elpui tur chu Chhingcows hi an ni.

I Day Football-ah khan Police-in match hmasa berah Chhinga Veng hi 2-0 in an hneh a, Malsawmfela leh Lalbiakhlua (Hlutea) ten goal an khung. An intawnna hnuhnung berah hian Police hi chak zawk mah se khelmualah erawh an chungnunna a tam lo a, Chhinga Veng hian player ṭha an lakluh leh tawh avangin team pahnih hi an intluk tawk khawp ang.

Police coach BS-a Colney chuan, "MPL chu kan hriat ang ṭhin tho kha a ni a, a harsa dawn. I Day Football ai khan kan ṭang dawn a, hneh sa tih a awm thei lo. Kan hneh tawhna kha chu a zo tawh a, a tir aṭangin chak tumin kan khel ang," tiin a sawi.

MPL-ah hian Under 18 player chu khelmual chhungah pakhat tal an awm reng tur a ni a, hemi a nih avang hian Police team hi an danglam hret dawn. Police Under 18 aṭangin Lalruatkima, Vanlalfakawma, Daniel Lalliana, Vanlalpeka, VL Hmangaihsanga leh Joseph Lalrinawma te chu an ziah luh belh a, team-in an ṭhatpui dawn nge an chhiatpui dawn tih chu Chhinga Veng an khelh hunah hian a hriat ang.

Chhinga Vengin India junior team tana khel tawh Zamzama leh Lalrokima te bakah Shillong Lajong tana khel tawh Lalrohlua te an lakluh belh a, an squad a chhah sawt. Coach Anand Gurung chuan, "2-0 a kan hneh tawh loh team an nih avangin kan fimkhur a ṭul dawn a, MPL-ah chuan point hmu turin theihtawp chhuah tak tak a ngai a, kan team pawhin theihtawp kan chhuah ang," tiin Vanglaini a hrilh.

MPL en man Rs 50
Vawiin aṭanga khelh ṭan tur Zote Honda Mizoram Premier League Season 9 en man hi Rs 50 a ni dawn. Inelna hi RG Stadium leh Lammualah khelh a ni ang a, round 7 hi Khawzawlah khelh a ni bawk ang. A hmuna en hman lo tan Zonet Rihnim leh Empai hmangin a en theih bawk ang.
Zonet (subscriber) pawtsa tan Rihnim channel hmangin MPL9 hi a en theih dawn a, online hmanga en duh tan Zonet Empai hmangin a en theih. Empai subscribe man hi Rs 199 niin he online app hmang hian MPL chauh ni loin Zonet show hrang hrangte a en theih a ni.

MPL9 Lawmman
Mizoram Premier League Season 9-a lawmman atana sum sem ral tur belhkhawm hi 20,76,000/- a ni. Match tinah club-te hnenah lawmman pek an ni dawn a, a chak zawkin Rs. 3,000 an dawng ang a, a chak lo zawkin Rs. 2000 an dawng ang. An in draw erawh chuan Rs 2,000 ve ve pek an ni thung ang. Hei hian semi final leh final a huam tel lo thung. Match tinah man of the match thlan a ni dawn a, man of the match-a thlan hian Rs 1000 zel an dawng ang.

Lawmman
Champion Rs. 6,00,000
Runner Up Rs. 3,30,000
3rd Place Rs. 2,20,000
4th Place Rs. 1,60,000
5th Place Rs. 1,35,000
6th Place Rs. 1,10,000
7th Place Rs. 85,000
8th Place Rs. 60,000
Fairplay Rs. 20,000

Mimal lawmman sem
Best Goalkeeper Rs.5,000
Best Defender Rs 5,000
Best Midfielder Rs 5,000
Best Forward Rs 5,000
Best Player Rs 5,000
Top Scorer Rs 5,000

Fixtures
ROUND 1 - RG Stadium
September 8, Ningani
Chawnpui FC 12:00 PM Aizawl FC
Chhinga Veng FC 3:00 PM Mizoram Police FC
September 9, Zirtawpni
FC Venghnuai 12:00 PM FC Bethlehem
Chanmari FC 3:00 PM Electric Veng FC

ROUND 2 - RG Stadium
September 12, Thawhṭanni
Chanmari FC 12:00 PM Chhinga Veng FC
Chawnpui FC 3:00 PM FC Venghnuai
September 13, Thawhlehni
Mizoram Police FC 12:00 PM Electric Veng FC
FC Bethlehem 3:00 PM Aizawl FC

ROUND 3 - RG Stadium
September 15, Ningani
FC Bethlehem 12:00 PM Chanmari FC
Mizoram Police FC 3:00 PM Chawnpui FC
September 16, Zirtawpni
FC Venghnuai 12:00 PM Chhinga Veng FC
Aizawl FC 3:00 PM Electric Veng FC

ROUND 4 - RG Stadium
September 22, Ningani
Mizoram Police FC 4:00 PM Aizawl FC
FC Venghnuai 7:00 PM Chanmari FC
September 23, Zirtawpni
Electric Veng FC 4:00 PM Chhinga Veng FC
FC Bethlehem 7:00 PM Chawnpui FC

ROUND 5 - Lammual
September 27, Thawhlehni
Aizawl FC 4:00 PM Chanmari FC
FC Venghnuai 7:00 PM Mizoram Police FC
September 28, Nilaini
Chhinga Veng FC 4:00 PM Chawnpui FC
Electric Veng FC 7:00 PM FC Bethlehem

ROUND 6 - Lammual
September 29, Ningani
Aizawl FC 4:00 PM FC Venghnuai
Chanmari FC 7:00 PM Mizoram Police FC
September 30, Zirtawpni
Chawnpui FC 4:00 PM Electric Veng FC
Chhinga Veng FC 7:00 PM FC Bethlehem

ROUND 7 - Lammual
October 6, Ningani
Mizoram Police FC Tbd FC Bethlehem
Chhinga Veng FC Tbd Aizawl FC
October 7, Zirtawpni
Electric Veng FC Tbd FC Venghnuai
Chanmari FC Tbd Chawnpui FC

MPL dan pawimawh bik
Ball: Inkhel zawng zawngah Official Ball ‘Nivia Dominator 3.0’ hman a ni ang. A remchang lo a nih chuan MPL Board hriatpuina chauhin ball dang a hman theih ang.

Matchday Squad: Match apiangin Squad-ah hian player 20 bakah coach, asst coach, manager, asst manager leh physio (20+5) an awm thei ang.
Under 18 player: League match zawng zawngah hian team tinin U-18 player (01.01.2005 hnua piang) pakhat tal playing XI-ah an tel reng tur a ni. Under 18 player-te hian field chhungah hriat hran an nih theih nan arm band an hreng ang.