Man United leh Ronaldo inlan hun

Zaninah Europa League khelh a ni dawn. Dar 12:30 hian Cristiano Ronaldo awmna Manchester United chuan Real Sociedad an mikhual ang. Europa League ni mah se Ronaldo a inlan dawn miau avangin ngaihven a hlawh ang.

Champions League khelh beisei, mahse khel phak ta chiah lo Arsenal pawh an inlan dawn. Mikel Arteta naute hian dar 10:15-ah Zurich an lenchilh dawn, team nem an hmachhawn dawn avangin player naupang leh inkhel khat deuh tan inlan hun a ni dawn.

Team thar
Erik ten Hag-a'n Manchester United thar din a tum a, a duh tak player a lakluhte chungah rinna a nghat ngam tih chu a team thlan dan aṭang pawhin a lang. Zaninah pawh hian team hmel hmang thar a rawn chhawp chhuah a rinawm.

Arsenal nen match hautak an khel zo chauh a, Europa League an khelh aṭanga darkar 72 vel bawrah Crystal Palace nen Premier League an khel lehnghal dawn, hahchawlhna hun an neih tlam avangin squad siksawi ngei chu a ngai ang.

Ajax aṭanga lak Antony leh Lisandro Martinez ten hmun pawimawh an chang a, zaninah erawh hahchawlhna hun pek an nih a rinawm. Real Madrid aṭanga lakluh Casemiro erawh a vawi khat nan inkhel bul a ṭan ve a rinawm.

Ronaldo awmna
Champions League goal khung hnem ber chu Ronaldo (141 goals) a ni, player ropui bik hian a ropuina hmun UCL khel tura Man United a tlin zawh pui miau loh avangin Europa League a khelh a ngai a, a tan thil thar a ni ang.

Kum 37 mi Ronaldo hian zanina an hmachhawn tur Real Sociedad hi a ngam hle. Real Madrid tana a khelh lai khan Sociedad hi vawi kua a hmachhawn, goal 15 a khung bakah a ṭhiante khung tur vawi li a siamsak bawk - zaninah a inlan a nih chuan Spanish club tan ven ngai bik a ni dawn.

Ronaldo chauh a ni lo, Casemiro leh Raphael Varane te pawhin Sociedad hi an hrechiang. Group stage bikah chuan an elpui ber tur niin an lang a, chuvangin Old Trafford-ah point thum hlawhchhuah nghal tumin an bei ang.

UEFA - Europa League
Zanin Inkhel Tur
Zurich 10:15 PM Arsenal
PSV 10:15 PM Bodo/Glimt
AEK Larnaca 10:15 PM Rennes
Fenerbahce 10:15 PM Dinamo Kiev
Ludogorets 10:15 PM AS Roma
HJK 10:15 PM Real Betis
Malmo 10:15 PM Sporting Braga
Union Berlin 10:15 PM Union Saint-Gilloise
Manchester United 12:30 AM Real Sociedad
Omonia Nicosia 12:30 AM Sheriff
Lazio 12:30 AM Feyenoord
Sturm Graz 12:30 AM Midtjylland
Freiburg 12:30 AM Qarabag
Nantes 12:30 AM Olympiakos
Red Star Belgrade 12:30 AM AS Monaco
Ferencvaros 12:30 AM Trabzonspor