Asia Cup aṭangin India an tla?

Asia Cup ṭantirha champion rinkai ber chu India an ni a, Rohit Sharma hoten an match hmasa berah an elpui ber tura ngaih Pakistan an hneh leh bawk avangin Men in Blue tan nomawi chawi turin hna harsa a awmin a lang lo.

Amaherawhchu, Super 4-ah India tan mangchhia a thleng a, Pakistan an hneh loh hnuah Sri Lanka an hneh loh avangin final lut lo thei dinhmunah an ding. He thu i chhiar meuh chuan an tla thei bawk.

Thawhlehni zan khan Dubai International Stadium-ah India-in Sri Lanka an hmachhawn a, wicket rukin an hneh lo. Men in Blue hian 173/8 runs an siam a, an target chhawpsak 174 runs hi a chhe lo. Mahse, Lions-in ball khat dah bangin 174 runs an siam a, hnehna an chang.

India an tla?
India hian Super 4-ah match hnih khel tawhin chak an la nei lo. Rohit Sharma hote hian final lut tur chuan vanneihna an mamawh a, an hmelma Pakistan-in chak hmel an hmuh tawh loh a ngai.

Shaheens hian nizan khan Afghanistan an hmachhawn a, result kan hre hman lo. Pakistan hi chak ta lo reng pawh ni se September 6, Zirtawpni hian Sri Lanka an hmachhawn leh dawn a, Babar Azam-a hote hi an chak loh zawn a rinawm loh hle.

Target ṭha thawkhat
India tan captain Rohit Sharma-a'n ball 41 lekah 72 runs a vaw chhuak a, thlawptu ṭha deuh nei se 200 runs chho target chhawp nei tur an ni. Mahse opener KL Rahul-a'n run ruk chauh a vaw chhuak a, Virat Kohli lahin run a siam lo.

Suryakumar Yadav-a'n 34 runs vaw chhuakin Hardik Pandya leh Rishabh Pant ten 17 runs ve ve an siam. India-in a khat tawkin wicket an hloh reng a, Deepak Hooda-a'n inhliam Ravindra Jadeja hmunruak a luah zo lo. Ravinchandran Ashwin-a'n 15 runs siam hmangin an dinhmun a ṭha hret a, 173/8 runs an siam.

Beiseina beidawng
India vs Pakistan part III thleng tur chuan Men in Blue an chak ngei a ngai a, nomawi an duh a nih pawhin chak ngei a ngai, hemi a nih avang hian cricket ngainatute tan chuan Rohit Sharma hote an chak hi a pawimawh hle.

Mahse, Sri Lanka-in tum dang an nei. Opener Pathum Nissanka (52) leh captain Kusal Mendis (57) te inkawpin 97 runs an siam hman a, wicket an hloh har avangin Lions-in beiseina sang tak an neih phah. Charith Asalanka duck out lehnghal a, Danushka Gunathilaka pawhin run khat chauh a siam.

India beiseina sang hman mah se Bhanuka Rajapaksa (25) leh Dasun Shanaka (33) ten Sri Lanka chu a tawp an thlenpui. Over tawp berah Pakistan an hmachhawn ṭum ang thoin Arshdeep Singh-a'n a rawn vawm a, Lions-in run sarih chauh an mamawh tawh avangin Arshdeep hian boundary pe lo mah se India a chhan zo lo.

Asia Cup-ah India-in beisei an pha lo a, an hmachhawp chu Asia Cup aia lian zawk T20 ICC World Cup a ni dawn. Inelna hi October 16 aṭangin Australia-ah khelh ṭan a ni dawn a, BCCI selector-ten India player tur an thlan dan tur hriat a châkawm tawh hle.