Chelsea an tlawm; a tuartu chu Tuchel!

Nipui transfer-a Chelsea sum sen zat chu pound maktaduai 272 a ni a, Dinamo Zagreb squad pumpui man zat erawh pound maktaduai 90 pawh a tling phak lo - lehkhaa team pahnih inthlauhna chu sang tak a ni.

Mahse, khelmualah Dinamo an chungnung zawk a, Thawhlehni zan khan Champions League-ah Mislav Orsic goal khung hmangin Chelsea chu 1-0 in an hneh - a tawpa tuartu chu Thomas Tuchel a ni a, nimin khan London club hian an coach an ban thu an puang.

Chelsea chuan thuchhuah siamin, "Club neitu tharten Chelsea ni 100 an enkawl tling ta a, club hmasawn zelna tur a ngaihtuahna kawngah tun hi inthlak danglam hunah a ngai a ni.

"Chelsea FC chuan Thomas leh a thawhpuite zawng zawng chungah, an hnathawh avangin lawmthu a sawi a, nomawi an chawi zozai avangin he club chanchinah chuan an tel reng tawh ang," an ti a, Chelsea coaching staff -ten team enkawl hna an thawk lailawk ang.

Tuchel banna game!
Dinamo-in 3-1-4-2 formation hmangin team an rawn rem a, tlarhnung rem phui a, counter hmanga Chelsea nawr let an tum tih a lang - minute 13-na lekah an tum ang takin an ti a, an hlawhtling nghal bawk. Chelsea-in Raheem Sterling leh Kai Havertz hmanga Dinamo an rum ṭhaih hnu lawkah Croatian club hian Chelsea an nawr let.

Robert Ljubicic chuan an penalty box aṭangin ball a thlawh chhuak a, Kalidou Koulibaly-a ven karah Bruno Petkovic chuan Orsic tan a lo tauh thla. Orsic hi Wesley Fofana chuan veng mah se Croatian attacking midfielder hi a um phak lo a, Edouard Mendy aia bul ṭantu Kepa Arrizabalaga man phak lohin goal-ah a chantir.

Chelsea-in goal an chhuah hnuah an nawr zui a, mahse, an duh ber goal an hlawh chhuak thei chuang lo - Pierre-Emerick Aubameyang chuan Blues tana a match hmasa ber khel mah se a hriam tawk lo a, a thlaktu Armando Broja lahin eng ruai a ang lo.

Mason Mount-a'n hun duhawm nei mah se Croatia goalkeeper Dominik Livakovic chuan a dansak a, Kai Havertz-a'n hnai tak aṭanga a tauh chu full back Ljubicic chuan a lo dansak bawk - Blues tana Reece James-a post pet per pawh uiawm a tling. Hetihrual hian Dinamo hi goal khung belh thei an ni a, Stefan Ristovski shot ṭha zet chu Kepa chuan ṭha zeta lo dangin a team a chhanhim.

Mangṭha Tuchel
Kum 49 mi Tuchel hian January 26, 2021 khan Chelsea enkawl hna a thawk ṭan a, Blues legend Frank Lampard a thlak - thla li hnu lawkah Champions League nomawi a chawipui zui a, fak a hlawh hle.

Borussia Dortmund boss hlui hian UEFA Super Cup leh FIFA Club World Cup-ah Chelsea hi champion nomawi a chawipui zui a, club neitu thar inthlak boruak karah ṭha takin Chelsea a kaihruai.

Todd Boehly leh a thawhpuiten Chelsea an lei rualin Tuchel chunga rinna an nghah thu an sawi a, nipuiah pawh sum ṭhahnem tak an pe - mahse, Tuchel-a'n pound maktaduai 200 chuang a seng chungin club neitute lungawina khawp result a nei thei lo a, ban a ni ta.

London club hian nipui transfer-ah Antonio Rüdiger, Andreas Christensen, Timo Werner leh Romelu Lukaku chu player an chân langsar zual a ni a, player lalut ve bawk mah se a bik takin tlarhnungah Rudiger leh Christensen hmun ruak luah zo an nei rih lo.

September 6, Thawhlehni Zan
 Group E Results
Dinamo Zagreb 1 - 0 Chelsea
DIN: Mislav Orsic 13'
Red Bull Salzburg 1 - 1 AC Milan
RBS: Noah Okafor 28'
ACM: Alexis Saelemaekers 40'
 Group F
Celtic 0 - 3 Real Madrid
REM: Vinícius Júnior 56'; Luka Modric 60'; Eden Hazard 77'
RB Leipzig 1 - 4 Shakhtar Donetsk
RBL: Mohamed Simakan 57'; Marian Shved 16', 58'; Mykhaylo Mudryk 76'; Lassina Traoré 85'
SHA: Mohamed Simakan 57'
 Group G
Borussia Dortmund 3 - 0 FC Copenhagen
BOR: Marco Reus 35'; Raphaël Guerreiro 42'; Jude Bellingham 83'
Sevilla 0 - 4 Manchester City
MNC: Erling Haaland 20', 67'; Phil Foden 58'; Rúben Dias 90+2'
 Group H
Paris Saint-Germain 2 - 1 Juventus
PSG: Kylian Mbappé 5', 22'
JUV: Weston McKennie 53'
Benfica 2 - 0 Maccabi Haifa
BEN: Rafa Silva 49'; Álex Grimaldo 54'