Tu nge Haaland dang zo ang?

Erling Haaland-a'n goal khung a ṭhulh thei lo - Thawhlehni zan khan Champions League-ah Norwegian striker hian goal hnih ngawt a khung leh ta a, Champions League-ah Manchester City chuan 4-0 in Sevilla an sawp - kum 22 mi Haaland hian tun season-ah match riat khelin goal 12 a khung tawh!

Inkhel ṭan aṭanga minute 20-na lekah Haaland hian goal a khung ṭan a, Kevin de Bruyne-a siamsak ṭha tak chu Sevilla tlarhnungte tih buai hman lohin a tlawh goal.

Haaland-a'n first half tawp hmain chance duhawm dang nei leh mah se Jack Grealish-a siamsak a pet chu Sevilla keeper Yassine Bounou chuan a dang hman.

First half-ah goal dang a lut lo a, mahse, City tha a zat sawt em ni chu aw, tih mai tur a ni. Minute 58-naah Phil Foden chuan amah vengtu Nemanja Gudelj chu mawi zeta a bum kual hnuah a khung a, 2-0 a ni.

Minute 10 a liam a, Haaland leh Foden bawk kan hmu - English midfielder Foden-a shot chu Bounou chuan lo dang leh mah se a per lehlam chu Haaland hian a lo pet leh hman a, 3-0 a ni der.

City hi awlsam takin an chak dawn tih a lang tawh. Mahse, centre back Reuben Dias chuan duhtawk loin, hun pek belh minute hnihnaah a khung ve leh a, 4-0 in an chak.

Pep Guardiola-a'n hliam vangin John Stones leh Kyle Walker a chhawr thei lo a, Borussia Dortmund aṭanga an lakluh thar Manuel Akanji chuan bul a ṭan - mahse, Switzerland defender tan hna hautak sawi tur a awm rih lo.