Eden Hazard a nui leh ta

Ni 650 hnuah Eden Hazard chuan European football-ah goal a khung ve leh ta a, Real Madrid a pan hnua hliam vanga a hun tam zawk khelmual pawna hmangtu hi a nui ve leh ta.

Thawhlehni zan khan Cham-pions League group stage-a an match hmasa berah Real Madrid chuan 3-0 in Celtic an hneh a, Vinícius Júnior leh Luka Modric ten goal khat ve ve an khung bawk.

Celtic Park-a inkhelah Real hian first half chhungin goal an khung lo a, minute 30-naah hliam vanga Karim Benzema lakchhuah a ngaih bawk avangin Real dinhmun a ṭha lo hman.

Mahse, Benzema thlaktu Hazard chuan an thiampuipa inhliam chu chance duhawmah a chantir a, goal a khung bakah assist vawi khat a nei bawk.

Real tan minute 56-naah Vinicius chuan goal hmahruai a khung a, Federico Valverde siamsak chu chak taka tlan lut chungin a khung - Celtic an insiamṭha hman lo, minute li a liam a, Real bawkin goal an khung.

Hazard chuan halfway line aṭanga ball khalh ṭanin Modric tan a siamsak a, Croatian midfielder hian an goal hnihna turin a khung - a la tawk lo cheu!

Kum 31 mi Hazard hun a her chhuak a, minute 77-naah team goal dik tak a khung - Belgian forward-in a hmawr a bawk hma hian Real player-ten vawi 33 zet tihbuai lohin ball an in pass a, 2003-04 hnua mumal taka record a awm hnua Real Madrid-in Champions League-a goal 434 an khung zinga, goal luh hmaa an in pass hnem ber a ni.

Scottish champion Celtic-in bul an ṭan ṭha takzet a, chutihrual chuan Ange Postecoglou leh a naute tan vawi 14 zet European champion meuh hneh chu thil harsa a la ni rih tih a lang.