Dan theih loh Kylian Mbappe

Paris St-Germain chuan hnehna nen Champions League bul an ṭan. Paris club tan player ṭha rual zinga langsar ber chu Kylian Mbappe a ni, France international hian goal hnih khungin Juventus lakah a team hi 2-1 in hnehna a chanpui.

Neymar-a'n Juve player chu ball a pir khum a, ball kang hian lei a thlen hmain Mbappe-a'n a hlap lut nghal pawp. PSG hmatawng an hlauhawm, Lionel Messi chu ball semtu pawimawh a ni a, a ke aṭanga chhuak chu Achraf Hakimi-a'n a cross, laklawh nei miah loin Mbappe bawkin a khung.

Kum 23 mi Mbappe hian hattrick siam theihna remchang pawh a nei, mahse a hun ṭha neih hi goal hrulah a kal. UCL-ah hian goal 35 a khung tling der tawh a, hetiang zat goal khung thei naupang ber record chu a siam ta tho.

Juve manager Chris-tophe Galtier chuan, "Goal hnih kan khung a, a dang khung theihna remchang pawh kan insiam hnem hle. Juve kha an beidawng lo a, an huaisen bawk. A tawpah chuan kan defender ten hnehna min chanpui," tiin a sawi.

Juventus hian team nghet an la din thei lo. Hliam vangin Massimiliano Allegri-a'n a duh angin team a la rem thei lo a, an khingpui hi PSG an nih bakah an inkhelhna hmun hi Paris khawpui a nih avangin a harsa, goal hnih chauh an chhuah kha an vannei.

Substitute Weston McKennie-a'n Old Lady tan goal khat a sut ṭhen a, striker Dusan Vlahovic-a ball tauh chu Gianluigi Donnarumma chuan a lo dansak bawk, goal hnih an chhuah hma em avangin thawhchhuah an harsat.

Juve coach Allegri chuan, "A tir lam minute 20 chhung kha a harsa, a bul kan ṭan fuh lo kha a pawi. Second half kan khelh dan thlir kha chuan ṭha tak pawhin kan khel thei tih a chiang, chuvangin hmalam hunah thil ṭha kan beisei tur a ni ang," a ti.

Thawhlehni zan Group H inkhel dangah Benfica chuan Maccabi Haifa 2-0 in an hneh ve bawk.