Kyrgios hnehtu Khachanov a tlang

Karen Khachanov chuan Nick Kyrgios hnehin US Open semifinal a inhlangkai. Zirtawp zanlaiah Casper Ruud nen final luh inchuhin an inkhel zui leh dawn, nomawi chawi turin player pahnih hian match hnih chak an la hmabak.

US Open khelh laiah hian Rafael Nadal leh Daniil Medvedev an tla tawh a, anni an tlak takah chuan kuminah hian champion thar an awm ngei dawn tih a chiang a, quarterfinal thleng zingah Grand Slam nomawi nei an awm lo bawk, a tu emaw ber chuan mellung pawimawh bik a phun dawn.

Mangṭha Kyrgios
Nick Kyrgios hian season duhawm a hmang, a zawnin Grand Slam final luh beiseina pawh a nei sang hman. Mahse, set khatna an khelh laiin a malpui vei lam hliam enkawl lailawk a ngai a, darkar thum leh minute 39 an inkhelh hnuah 7-5, 4-6, 7-5, 6-7(3), 6-4 in a chak lo.

World number 31 Khachanov hian awlsam tak erawh chuan hnehna a chang bik lo, set khatna bika game 12-naah a khingpui service a chhuhsak thei chauh a, hemi hnu hian Kyrgios-a'n hliam tenau a tuar.

Australian tlangval Kyrgios hian theihtawpin a bei chhunzawm, set hnihna a lak bakah set thumna la tur pawhin beisei a nei sang, mahse hun pawimawh laia chesual zawkah a ṭang a, ama service ngei a hum theih tak lohah chuan a tlawm zui ta a ni.

Khachanov chuan, "Kyrgios khan thapui a thawh a, set ka lak dawn thleng khan a beidawng ngai lo. A tir aṭanga a tawp thleng khan inkhel harsa leh hautak tak chu a ni, match hautak ka paltlang theih avangin inrintawkna pawh ka neih belh," a ti.

Ruud a tlang
Quarterfinal inkhel dangah seeded pangana Casper Ruud chuan Matteo Berrettini chu 6-1, 6-4, 7-6(4) in a hneh a, tun ṭumah hian a champion a nih chuan Grand Slam nomawi mai bakah world number 1 nih theihna remchang a ni dawn.

Kum 23 mi Ruud hian French Open-ah pawh khan final a lut tawh a, mahse player ropui Nadal a ngam lo. Paris khawpuia inelna aṭang khan tawnhriat tam tak a neih belh a, tun ṭumah hian final a lut leh thei a nih chuan a boruak a danglam tawh ang.

Norway tlangval Ruud chuan, "Tournament kan khelh ṭan dawn kha chuan, inelna zawh hunah world number 1 ka ni thut thei tih hi ka rilruah a awm phak lo. Hun remchang a awm takah chuan phurna nasa tak min siamsak.

"Mahse, phur lutuk avanga khelh dan phung tih danglam chu a remchang lo ang," tiin a sawi. Inelna neih laiah a match hmasa ber aṭangin awlsam taka chak a la nei meuh lo a, fiahna erawh a paltang chho zel - Khachanov lakah pawh awlsam taka tlang a harsain a rinawm.