Nehru Junior Hockey-ah Mizoram mipa U17 ten phase II an thleng

50th Nehru Junior Hockey Tournament chu Shivaji Stadium, New Delhi-ah neih mek a ni a, kum 17 hnuai lam inelnaah hian Mizoram team-in phase I-ah an khingpui hneh vekin phase II an lut. Nimin khan phase II match hmasa berah NCC Blue an hmachhawn a, 3-2 in an hneh lo.

Mizoram hi SYS tirh an ni a, Govt High School Kawnpui hmingin SYS enkawl Kawnpui Boys Hockey Academy-te an tel. Mizo nula Lalremsiami hmangin India ram pum huapah Mizo langsar mah se mipa lamah erawh Mizoram a hnufual hle. Tun ṭuma Mizoram U17 ten phase II an thleng hi chanchin lawmawm a tling.

Inelna hi September 2 aṭanga ṭan kha a ni a, Mizoramin an match hmasa berah Maharashtra chu 3-1 in an hneh. Man of the match-ah Lalruatsanga an thlang. Match hnihnaah Mizoram hian Gujarat 7-4 in an hneh a, David Zorempuia chu man of the match-a thlan a ni leh bawk.

Phase II hi league-a khelh tur a la nih avangin Mizoram tan beisei tur a la awm a, September 9, Zirtawpni hian Punjab an hmachhawn leh ang. Mizoram team hi manager R. Lalnunmawii leh coach Lalmuanawma ten an enkawl a ni.