The Miracle of Istanbul Football khawvel barakhaihtu

Coronavirus vangin European football chawlh ngai lo se chuan tun kar titi ber chu Champions League semifinal a ni ang a, European club inelna sang berah tu nge final lut dawn? tiin zawhna kan in zawt ang. 

Mahse, hri leng vangin infiamna khawvel a reh ṭhuap a, football ngainatute tana mit tlaina ber tih ngam Champions League chanchin pawh hriat tur a awm lo a, European club liante khelmual chu an reh ṭhiap a. Chutianga Champions League lunglenna boruak zam vel karah chuan mitthlain Liverpool a hmu a, ni e, kum 2005-a mak leh ropui taka Europe ngamtu Liverpool ngei mai kha - first half-a 3-0 ngawta an hnufual hnua penalty hmanga AC Milan lehthaltu kha!

Mi tam takin kha inkhel kha football-a thil thleng ropui ber ang hialin an la chhal a, final khelhna hming chawiin 'The Miracle of Istanbul' tia hriatreng a ni ta hial - beiseina, tumruhna, mittui leh thlantui zawng zawng kha inkhel khan min hmuhtir miau a ni. 

2004-05 season-a Liverpool leh AC Milan hi khaikhin chi an ni lo - an inthlau lutuk! Reds hian Steven Gerrard, Sami Hyypia leh Dietmar Hamann tih loh chu world class player tia sawi tur an nei lo.

Xabi Alonso-te pawh tun hnuah khawvela midfielder ṭha ber pawl ni mah se hetihlai hian player tuai tir, English club-a nunchan zir ṭantir chauh a la ni a, striker chhuanvawr Michael Owen lahin Real Madrid lamah ropuina beiseiin a chhuahsan. 

AC Milan erawh bul ṭantu player ringawt pawh en ila - Dida, Cafu, Jaap Stam, Alessandro Nesta, Paolo Maldini, Andrea Pirlo, Gennaro Gattuso, Clarence Seedorf, Kaká, Andriy Shevchenko leh Hernán Crespo te an ni a, an vai hian 'world class' vek an ni. Filippo Inzaghi chu squad-ah pawh a awm lo!

Bench lam en pawhin Rui Costa leh Jon Dahl Tomasson-te ho an la awm a, Indian football tana hriatreng tlak pakhat chu Milan tana bench-a ṭhu zingah hian Indian thisen kai footballer zinga thleng sang ber anga chhal ngam Vikash Dhorasoo a tel. 

Champions League final kalkawng thlir pawhin team pahnih an inthlau hle. Milan hi Barcelona nen group khata awm chungin tlawm an nei miah lo a, knockout round-ah Manchester United, Inter Milan leh PSV Eindhoven an paltlang - goal 10 an khung a, an lamah goal thum chiah a lut thung. 

Liverpool erawh group stage match tawp bera Olympiakos an hneh hram avanga knockout round lut an ni a, an final kalkawngah Bayer Leverkusen, Chelsea leh Juventus an hneh avangin inrintawkna erawh an nei. 

Mahse, Istanbul khawpuia Atatürk Olympic Stadium-a fans 69,000 pungkhawm hmaah Liverpool an inring hman lo. "You'll never walk alone," tih hla saa an player-te au phurtu Liverpool fan-ten chang khat pawh an sak zawh hmain goal an chhuah!

Milan tan Andrea Pirlo freekick aṭanga ball kal chu captain Maldini chuan minute khatna lekah a khung a, minute 45 a thlen hmain Hernan Crespo chuan goal hnih a khung zui - Liverpool beiseina a chuai a, si thum an phur 

fel der. 

Liverpool hian beiseina sang tak nen European football-a coach 'hot' pawl Rafael Benitez an lalut a, ropui taka Valencia kaihruaitu hian Champions League nomawi a chawi lo a nih chuan Liverpool-a a season khatnaah a mualpho dawn tih a hria. 

Merseyside club hi league-ah pangana an ni a, match 38 an khelhah vawi 14 ngawt an tlawm. Benitez tan mualpho khuhna turin Champions League nomawi chawi a ngai a, mahse final-ah an mualpho mek a ni lawi si!

Benitez hian tihsual lian tak pakhat a nei - a hman thiam sa 3-5-2 hmang loin 4-4-1-1 a hmang a, a fimkhur luat vang a ni. No. 10 position-a khel ṭhin Gerrard chu pawt letin a laiah Alonso nen a inkawp tir a, a hunlaia player ṭha ber tih ngam Kaka veng turin a ti. 

Tlarhmaah Milan Baros maltlat tir a ni a, a hnung chiahah Harry Kewell a awm thung. Liverpool tlarhma pahnih tan Cafu, Stam, Nesta leh Maldini-te inkawp paltlang tum chu hna hautak a tling a, Kewell hi minute 23-na lekah hliam vangin lakchhuah a ngai zui. Gerrard leh Alonso lah an inkawp fuh tawk lo a, duhtawkin Kaka an leu tir a ni ber!

First half-ah 3-0 a ni tawh a, Benitez tan huaisen lohna chi a ni tawh lo. Spanish manager hian a formation a thlak tur thu a sawi a, bench-a awm Hamann dah lut a, tlarhmaah Gerrard chu zalenna pek a nih tur thu a sawi. 

Benitez hian midfield laiah Hamann hoin Alonso leh Vladimír Smicer a dah a, an hna ber tur chu Milan game chawi nungtu Kaka dan chah a ni a. Tlarhmaah Luis Garcia leh Baros awmin mual sir aṭanga tlan lut turin Gerrard chu zalenna pek a ni. 

Spanish manager chang rel a sual lo - a duhna hmun taka khel Gerrard hian minute 54-naah si phurh a rawn sut ṭhen a, thawm chu ring tak a ni! English midfielder huaisen hian theihtawp chhuaha kut vaivir chungin goal khung a lawm a, zam lo turin a player puite a fuih tel. 

Mahse, 3-1 a la ni. Minute hnih a liam hman lo - Smicer chuan Reds beiseina chhi nungin a rawn khung ve leh. Inkhel a la tawp lo tih a chiang. Gerrard bawk kan hmu - English midfielder dan dan tur ṭha ber anga a hriat hmangin Gattuso chuan Gerrard a lo ti tlu a, penalty a chawi. 

Gerrard penalty hlawhchhuah pet turin Alonso a lo pen chhuak a, Spanish midfielder hmel enin a zam tih hai rual a ni lo - a pet hmasak chu Dida chuan dang mah se a let leh lam erawh a chhuih lut ta tho a, 3-3 a ni!

Ih maw... chutihlai thawm chu sawifiah rual loha ropui a ni a, Kop ho hmela lawmna, beiseina leh mittui inchawhpawlh nuai chu hmuhnawm a tling. 3-0 kha 3-3 a ni a, beiseina a vul leh ta. 

Extra time thlengin team pahnihin goal dang an khung tawh lo. Penalty hmangin chak zawk zawn a ni a, Gerrard hun a zo tawh a, goalkeeper Jerzy Dudek tan a 'changtupa' nih hun a her chhuak ve thung. 

Serginho-a'n a pet over hnuah Polish goalkeeper hian Pirlo leh Shevchenko pet a dang a, 'hero' a ni - penalty-ah 3-2 in Liverpool an chak a, Champions League nomawi an chawi. 

"Mi tam takin Istanbul-a chawlhlawk laia thil thleng kha hriat chakin min zawt fo - beiseina zawng zawng hloh chung leh zak tak chungin khatihlai khan dressing room ka pan a ni. 

Fan-te hmel kha ka en ngam lo a, an banner ropui tak tak leh jersey sen vul chukte chu ka thlir ngam lo. Lei lam ka en tlat a, beidawnnain ka khat a, ka beiseina zawng zawng chu vaivutah chantir a ni ta. 

Inkhel khan ka rilru a luah tawh lo. Ka chhungte leh ka ṭhiante rilruah an lo lang a, khawvelin fiamthu thawh nana min hman dan tur ka thlir chuan ka zak em em ringawt mai a ni.

Final kan lo lut kher kher kha ka inchhir rum rum a, player chu kan ngawi vek ringawt mai a ni. Mahse, Ataturk dressing room-ah khan Rafa Benitez chuan Anfield chanchina cham reng tawh tur thawnthu chu a ziak a, theihnghilh theih a ni ta lo. 

Chi ai miah loin a lo lut a, khatiang boruak harsa a hmachhawn dan kha ka theihnghilh tawh ngai lo ang. Sapṭawng hman harsa ti tak chungin a ṭawng a, mahse 'tactical change' siam dan tur uluk taka a sawi khan a la beidawng ve lo tih min hriattir a ni. 

Khelmual kan lut a, fan-te chu 'You'll never walk alone' sain an lo la zai dup dup a. Beiseina aiin khawngaihna avanga sa hi an ang zawk mahin ka hria - mahse chu tah chuan thu hriat tel ka nei tlat. 

"Tun aia nasa chuan min mualpho pui tawh suh u," tih hi - goal khunga kan zahawmna neih let leh kha kan tum tawp mai a ni. 

Football-a pawimawh tak pakhat chu half time 'talk' a ni a, chawlhlawk laia player-te fuih phur thiam coach hi coach ṭha teh nana an hman pakhat a ni. 

Liverpool-in Champions League final-a Milan an hmachhawn kha Benitez-a'n English football-a season a hman vawi khatna a ni a, sapṭawng a la thiam lo hle. 

Benitez chuan, "Goal hnihna kan chhuah kha chuan chawlhlawka ka thusawi tur ka ngaihtuah tawh. Tunah chuan ka duh ang tak sapṭawngin ka sawi thei tawh a, khatihlai erawh kha chuan ka harsat hle a ni," a ti a, a duh ang tak pawh a sawi theih loh thu a sawi. 

Mahse, Benitez hian a sapṭawng thiam tawk lohna chu inhnehtir a tum lo. Formation a thlak tur thu a sawi hnuah a naute chu huaisen taka bei let turin a fuih. 

Atatürk Olympic Stadium dressing room-a Liverpool player-te chu an reh ṭhuap a, ngaihtuah muk tak nei hmel pu chungin Benitez a pen lut. 

Spanish manager chuan, "Kan beih let a ngai," a ti a, a chawl deuh dat a. "Min ṭantute lakah hian bat kan nei tih hria ula, indawm kun mai suh u. Liverpool kan ni a, Liverpool tana khel kan ni tih hi theihnghilh suh u. 

"In beidawn mai chuan Liverpool player inti tlak in ni lo. Final thleng turin kan thawkrim em em a, a thlawn chantir lo ang u. Minute 45 chu theihtawp chhuah leh ila, goal khung thum ang. Inrintawkna in neih chuan kan ti thei ang - 'hero' nihna remchang in neih hi bawhpelh suh u," a ti. 

Player-te an chhuak dawn a, kawngkhar lam an pan - physio Dave Galley chuan Benitez a ko let a, Finnan chuan minute 45 a tlin tawh loh tur thu a sawi!

Lak chhuah tura inngai tawh Traore a ko let a, boot a bun tir leh a, Finnan zawk chu bench-ah a dah - a tlachawpin an che a, mahse an huaisen miau avangin a hunlaia team ropui ber tih ngam hial AC Milan an hneh.