Murray-a’n ATP leh WTA inzawm a duh

Mipa tennis thuneitu sang Association of Tennis Professionals (ATP) leh hmeichhe lam enkawltu Women’s Tennis Association (WTA) an awm hrang a, tun hnaiah pawl pahnih hi inzawm duhtu an tam ta hle.

ATP leh WTA te hian thuneihna an nei hran ve ve a, inelna an buatsaih ṭhenkhat chu a inang lo. Tournament inang pawh sumdawnna vangin TV lama an pek chhuahna a in ang lo fo, infiamna chi khat ni si kha pawl pahnihin an enkawl tihna a ni.

Grand Slam vawi 20 champion tawh Roger Federer chuan ATP leh WTA hi inzawm a duh thu a sawi chhuak tawh, player langsar ṭhenkhat chuan Swiss tlangval an thlawp thu hi an sawi tawh.

World number 3 Murray chuan, “Intluktlanna hi tun hma aṭanga ka lo sawi ve fo tawh a ni a, ka ngaihdan chuan pawl pahnih inzawm hi ṭha ka ti hle, mi hrang hrang thusawi hian awmzia a neih ngei pawh ka ring.

“Kan awmkhawm a nih chuan pawl lian leh chak zawk a ding thei dawn, tennis infiamna pawhin a ṭhatpui ngei ka ring,” a ti. Murray hian a coach atan hmeichhia Amelie Mauresmo-i pawh a lo hmang tawh.

Coronavirus avangin tennis season hi an chawl lailawk mek. Indopui II-na hnua a vawi khat nan Wimbledon chu ṭhulh a ni a, Grand Slam pali zinga pahnih - French Open leh US Open te chu khelh theih hram an la beisei reng.