Bayern player an fihlim

Bundesliga champion Bayern Munich player-te chu Covid-19 an kai leh kai loh endik an ni a, tun lai hri leng lakah hian an fihlim vek nia hriat a ni - tunah hian training an nei leh mek tawh.

German chanchinbu lian Bild-in a tarlan dan chuan Bayern player bakah hian coaching staff pawh endik an ni. Bayern an him lai hian Cologne erawh an buai, player pahnih bakah hnathawktu pakhat chuan coronavirus an kai.

Tun thla chhungin Bundesliga hi khelh chhunzawm leh theih beisei a ni; May 9 hian sorkar lamin infiamna lian ho chungchanga an thu thar an puang dawn a, club lam chuan beiseina sang tak nen an nghak mek.

German sports minister Horst Seehofer chuan, “Bundesliga lamin ruahmanna an neih ka hmu a, kei pawhin May thla chhunga an khelh chhunzawm leh theih ka duhin ka beiseipui,” a ti.

German Football League (DFL) lamin inkhel kaltlangpui mah se a hmuna entu an awm theih a rinawm loh. Nimin tlai thleng khan German ramah hian hri kai mi 165,664 chuang awmin, thi zat pawh mi 6,866 an chuang tawh.