Wembley Stadium-ah Tottenham an tlawm nghal ; Champion Chelsea Chhuanawm

Chelsea-in an theihna an pholang leh ta a. Pathianni zan khan an elpui Tottenham Hotspur chu Wembley Stadium-ah 2-1 in an hneh.

Jose Mourinho leh Claudio Ranieri ten Premier League-a Chelsea leh Leicester City te an champion pui zawh season-ah result neih ṭhat loh avangin an ban. Blues-in an match hmasa bera Burnley an hneh loh ṭumin Gary Cahill leh Cesc Fabregas te hnawhchhuah an ni a, hei vang hian Antonio Conte leh a naute hi tlachhe thei dinhmuna an din thu an sawi uar hle. Amaherawhchu, Chelsea-in an elpui Tottenham lakah Marcos Alonso goal hnih hmangin point thum hlu bik an hlawh chhuak.

Blues hian nizana Manchester City hmachhawntu Everton chu Stamford Bridge-ah August 27, Pathianni zan khian an mikhual ang. Hemi zan vek hian Tottenham-in an match hmasa bera Chelsea hnehtu Burnley FC an mikhual dawn a, Mauricio Pochettino hoten point thum an hmu lo a nih chuan White Hart Lane sak ṭhat vanga home match khelhna atana hman Wembley Stadium an ṭih khawp ang.

Pa fing Conte
Chelsea-in hliam vangin an thiampuipa Eden Hazard an la chhawr thei lo a, hrem vangin Fabregas leh Cahill te an chhawr thei lo bawk. Hei chauh hi a ni lo a, Pedro chu hliam vangin inkhel bul ṭantir ngam a ni lo a, mamawh vangin la inpeih lo chungin Monaco aṭanga an lakluh Tiemoue Bakayoko-a'n inkhel bul a ṭan bawk.

Italian manager Conte-a'n a player neih dan hre ranin goal ven­him tumin player a rem a, Cahill thlak nan Borussia Moncheng­ladbach-a season hnih chhung intat hriam tawh Andreas Christensen chu chhawrin defender ball thiam David Luiz chu midfield-ah a sawn hma. Midfield laia player pathum awm N'Golo Kante, Bakayoko leh Luiz te chu goal nawr aia goal venhim thiam zawk vek an ni.

Tlar hmaah Alvaro Morata chu mal tlattir a ni a, amaherawhchu Spanish forward hian hnai tak aṭangin a tauh goal lo.

Real Madrid aṭanga Chelsea zawmtu Morata hian Tottenham an hmachhawn ṭuma Conte-a'n a hna tura duansak chu a tlin meuh lo a, Blues ṭantute chuan Diego Costa inlamlet turin an duh ang a, hei erawh a thlen a rinawm rih lo. Amaherawhchu transfer hun a la tawp lo tih hriat a ṭha a, Chelsea player an la dam kim lo bawk a, Conte-a'n season tluana a chhawr tur player a neih kimah chuan Morata khelh dan milin game plan a siam dawn a, Spanish forward ṭhatzia pholanin a awm thuai ang.

Pathianni zanah erawh Conte-a'n a tum a tihlawhtling tho a, defender ball pet thiam Alonso chuan freekick aṭangin mawi zetin first half-ah a khung. Chelsea-in champion zia chhuahin substitute Michy Batshuayi-a'n an lama a tauh luh hnuah pawh hnual mai loin goal duhin an nawr ngam a, Alonso bawkin minute 88-naah chakna goal a khung.

Pa rorum Conte
Antonio Conte chet danah Burn­ley an hneh loh vanga inthlahrung hmel a pu lo a, Serie A-a vawi thum Juventus champion tawh Italian manager hi Wembley Stadium-ah a tlangnel hle. Khelmual chhunga player-te an thawhrim ang thoin khelmual sirah Conte a ṭang tih a lang a, awmze neia game plan a siam bawk avangin team chakna hnar a ni.

Inkhelh banah Chelsea boss chuan, "Khelmual chhung chauh kan ngaihtuah a, min sawiselna leh zawhna te hi khelmual pawnah kan chhan kher a ṭul lo. Kan dinhmun tawn mek hi a ṭha lo a, amaherawhchu ka player-te inpekna avangin ka lawm a, season ṭha tak kan hman ka ring," tiin a sawi.

A player-te fak chhunzawmin Conte chuan, "Player huaisen ka hmu. Football chungchang ka sawi lo a, kan team-a ka hmuh chu chak duhna thinlung, huaisena leh thawhhona ṭha a ni. Kan thawhrim avangin 100% in chak kan phu a ni," tiin an khelh dan ni loin an rilru put hmangah a lawm hle.

Wembley Stadium buaina
Tottenham-in hnehna an chang zo lo mah se an thiam tih hmuh hmaih rual a ni lo. Chelsea lakah ball possession 68% hial neiin goal attempt vawi 18 an nei a, hemi kawngah hian Blues aiin an letin an nei tam. Conte hote hian goal zawnah vawi hnih chiah a pet a, Pochettino hote erawhin vawi ruk lai goal zawnah an pet thung.

Spurs hian season liam ta khan an mual White Hart Lane-ah hneh loh an tawng lo a, vawi 17 chakin vawi hnih an inhnehtawk. Tun season-a home match an khelhna tur Wembley Stadium-ah erawh Spurs hian an match hnuhnung 10-ah vawi sarih an chak lo.

Tottenham tan Wembley Stadium hi vanduaina hmun tihna atan chuan a la hma deuh a, amaherawhchu White Hart Lane ang chuan an la hmang thiam rih lo ang.

Spurs hian Wembley Stadium-a Blues an hmachhawn hnuhnung paliah an hneh lo vek a, hei bakah hian Tottenham goal khung khawl Harry Kane hian August thlaah Premier League-ah goal a la khung ngai lo.

Kane hian August thlaa league match 12 a khelhah goal shot vawi 34 a nei a, goal khatmah a khung lo. Chelsea an hmachhawn ṭum hian English striker hian goal ban a pet per a, vawi riat zet shot neiin Kane-a'n league match-a goal khung si loa shot a ngah ber ṭum a ni.

Tottenham boss Mauricio Pochettino chuan, "Kan khelh dan aṭanga thlir chuan point hmu lo tawp tur chu kan ni lo. Vawi hnih goal zawna an petah an khung ve ve a, anni aiin kan khel ṭha a, amaherawhchu goal hmaah kan hriam tawk lo. Chutihrualin season liam ta aiin kil tinah kan khel ṭha vek a, kan result ni loin kan khelh danah chuan ka lungawi hle," tiin a sawi.