Mayweather vs McGregor ; Hlawh nei lo chuan ka en lo ang - Lennox Lewis
British boxer ropui Lennox Lewis chuan August 26-a inhnek tur mipui ngaihven Floyd Mayweather leh Conor McGregor inhmachhawn tur chu engmah lo mai a nih thu a sawi a, hlawh neia commentary pe tura an sawm te a nih ngawt loh chuan he inhnek hi en a tum loh thu a sawi!
World heavyweight champion hlui chuan, "Mipuiin an ngaihven a, a boruak pawh a lian hle. Mahse, kei chuan inhnek ropui tak ni turah ka ngai hran lo. Mayweather-a hmachhawn tur hi boxer ni loin UFC fighter a ni a, kei chuan fight puitlingah pawh ka chhiar lo," tiin khawvel ngaihven inhnek tur chu a ngainep hle.
Vawi 44 inhnek a hmachhawna vawi 41 hnehna chang thei boxer chuan sawi chhunzawmin, "Mi zawng zawngin enge thleng dawn an hre duh a, McGregor hian a ke thawhin Mayweather a pet mai ang em? tihte hi an hre chak. Ring chhung a luh meuh chuan Mayweather chungnun zia a hmu ang a, engtinnge a tih tak ang?" tiin Irish fighter chuan a ke a thawh mai a ring!
A vanglaia boxer ropui Evander Holyfield, Mike Tyson leh Vitali Klitschko te hneh vek thei khawpa inhnek thiam Lewis chuan, "Boxer 49 zetin Mayweather hneh dan an hai chhuak zo lo a, tunah ring chhung la rap ngai reng reng lo UFC fighter-in a hneh ang maw? Ka ngaihdan chuan engmah lo mai a ni. He inhnek en tur hian kal ka tum lo a, commentary hna thawk tura hlawh min pe a nih chuan ka en mahna," a ti!
Boxing a chawlhsan hnua McGregor hmachhawn tua lo kir leh Mayweather hian vawi 49 inhnek a hmachhawn tawhah hnehna a chang vek a, Irish fighter hi a hneh leh a nih chuan amah ang thoa American boxer Rocky Marciano record a khum dawn tihna a ni.