Sawi nghin zawh rual loh Barcelona

Ningani zanah firfiak ten Barcelona khawpui an bei a, he thu ziah a nih lai thlenga nunna chan zat chu mi 14 an tling tawh - an club innghahna khawpuiin chhiatna rapthlak a tawh hnu lawkah Barcelona-in tun season-a an La Liga match hmasa ber an khel a, Nou Camp-a mittui luang karah Real Betis chu 2-0 in an hneh. An khawpuia chhiatna rapthlak thleng meuh pawhin Barca a sawi nghing zo lo.

Barcelona tan hliam vangin Luis Suarez inlan thei lo mah se Catalan club-in an buai phah lo a, Spanish Super Cup-a 5-1 ngawta Real Madrid an ngam loh hnuah Gerard Deulofeu chuan 'Neymar thlaktu' nih ngei a tum tih khelmualah a pholang - Catalan club goal hnih hi Everton winger hlui ke aṭanga chhuak ve ve a ni.

Neymar = Deulofeu?

Pre season-ah Deulofeu a chet ṭhat avangin Barcelona-in Neymar thlakna an neiah ngaih a ni a, mah se Spanish Super Cup-ah Real Madrid-in La Masia chhuak forward hi an phum 'bo' a, Barcelona-in Philippe Coutinho leh Ousmane Dembele an melh reng bawk.

Mahse, Deulofeu-a'n Real Betis lakah a theihna tak tak a pholang a, minute 36-naah a ball cross chu Real Betis defender Alin Tosca-a'n an lamah a ti lut a, minute thum hnu lawkah Sergi Roberto goal khung tur a siamsak chhunzawm bawk. Barca tan Lionel Messi-a'n goal a khung lo - Argentine forward hian woodwork vawi thum ngawt a pet per!

Barca an ṭap

Nou Camp-ah inkhel ṭan a nih hmain firfiak beihna avanga chhiat tawkte pual hun hman a ni a, inkhelh ṭan hmain minute khat chu ngawi renga din a ni. Barca leh Real Betis player-ten armband dum an hreng ṭheuh a, Barcelona chuan an jersey hnungah player-te hming chhu kai loin 'Barcelona' tih an chhu bawk.

Mi 9,9000 lenna Nou Camp-a mipui 56,480 pung­khawmte chuan firfiakte beihna avanga an khawpui chu zam mai tur an nih loh thu "Kan hlau lo" tia au rual chungin an tlangaupui a, "Sawi nghin rual kan ni lo" tih banner intar karah mittui a luang.

Valverde thukhawchang

Inkhelh zawhah Barcelona boss Ernesto Valverde chu player transfer chungchang zawh a ni a, mah se Spanish manager hian engmah a sawi duh lo. Kum 53 mi manager chuan, "Tun dinhmunah chuan ka player neih chungchang bak engmah sawi theih ka nei lo," a ti.

Barca-in hliam vangin Gerard Pique, Andres Iniesta leh Suarez chhawr thei lo mah se Valverde chuan an buai phah loh thu a sawi. Spanish manager chuan, "Player hliam tam tak karah ka nauten an hnathawh tur dik tak an thawk a, an chungah ka lawm hle," tiin an khelh dana a lawm thu a sawi.

Real = Boom!

Real Madrid inkhelh thu sawi a nih chuan 'an chak' tihin a zui ngei ngei a ngai emaw tih mai tur a ni. Deportivo La Coruna khelmualah Real Madrid-in 3-0 in hnehna an chang a, hrem vangin Cristiano Ronaldo inlan thei lo mah se Gareth Bale an la neih cheu avangin buaina tur a awm lo.

Welsh winger hian minute 20-na lekah goal hmahruai a khung a, minute 62-naa Toni Kroos goal khung tur a siamsak bawk. Bale leh Kroos goal khung karah Casemiro chuan a khung ve bawk - Brazilian midfielder goal khung hi Real player-ten vawi 44 zet ball an in pass kual hnua lut a ni a, team 'goal' a ni.

Ramos = red card

Real Madrid-in 3-0 in hma an hruai a, hun pek belh an khel tawh tihah captain Sergio Ramos chuan ṭul lo takin red card a chawi. Spanish defender hian Fabian Schar hmaiah a nam avangin yellow card a chawi a, hemi hnuah hian ball kang an inchuhna lamah Borja Valle chu a kiua a nghawk luih avanga a yellow card pahnihna pek niin hnawhchhuah a ni.

Kum 31 mi Ramos hian Madrid tan a khelh hnuah red card vawi 23 a hmu tawh a, La Liga-ah vawi 18 hnawhchhuah a nihna a ni - Spanish La Liga-ah hian Sevilla defender hlui Pablo Alfaro leh Real Zaragoza tana khel ṭhin Xavier Aguado te chuan red card vawi 18 ve ve hmuin hmu tam ber an ni a, tunah chuan Ramos-a'n a zawm ve ta.

Bazar lo tur Real?

Real Madrid-in nipui transfer-ah player lakluh an la nei lo a, manager Zinedine Zidane chuan a neihsaah a lawm thu a sawi. French manager chuan, "Ka squad hi an nihdanah hian ka lungawi em em a ni," a ti a, "Hei bak hian kan inthlak danglam loh ka beisei," a ti zui.

Mahse, Real boss chuan, "August 31-ah transfer a tawp dawn chauh a, engpawh thleng thei a ni tih erawh kan hriat a ṭul," a ti zui a, transfer bazar-a Real dinhmun chiang takin a sawi duh lo.