Aizawl FC inthuam ṭha zel

I League champion lai Aizawl FC chuan nomawi humhim ngei tumin tun hnai khan goalkeeper Avilash Paul, Japanese striker Yugo Kobayashi leh Ivorian forward Leonce Dodoz te an lalut.

Aizawl FC technical director Hmingthansanga chuan tunkar chhoah foreigner pahnih dang an la lak belh tur thu a sawi a, Mizo club-in India ram club-te tana inelna sang berah Mizo mipui tihlawm nawn an tum hle.

MPL lam hi

Aizawl FC-in I League-a champion puitu coach Khalid Jamil thlak nan Paulo Menezes an lalut. Portuguese coach hnuaiah AFC-in I Day Football-ah Ramhlun North FC hnehin bul ṭan mah se match hnihnaah Chanmari FC hneh loin semifinal-ah an tla.

I League club hian MPL6-a an match hmasa berah Ramhlun North an hmachhawn dawn a, amaherawhchu August 31 aṭanga ṭan tur inelnaah hian foreigner pahnih chauh an chhawr thei ang.

MPL Handbook hmasa club pakhatin foreigner pahnih an ziahluh theih thu tarlan a ni a, hei vang hian AFC pawhin an neih sa Alfred Kemah Jaryan leh Kareem Omolaja Nurain te bak an ziah luh belh thei rih lo a. Alfred emaw Kareem emaw hi thlak an duh erawh chuan la thlak thei thung.

MPL-ah hian state pawn player pathum a ziahluh theih a ni a, East Bengal goalkeeper hlui Avilash Paul hian training a zawm tawh a, Mizo keeper Lalawmpuia leh H. Lalremruata te khelhna hmun a chuhpui nghal dawn tihna a ni.

I League lam

Aizawl FC-ah hlawhtling takin Japanese midfielder Yuta Kinowaki a khel tawh a, Mizo club hian Japanese player bawk la lehin striker Yugo Kobayashi an lalut.

Kum 26 mi Yugo hian Thai Division l League-ah Songkhla United FC tan match 33-ah goal 12 a khung. Hemi hma hian Philippines club JP Voltis FC tan khelin match 26-ah goal 20 a khung bawk.

Japanese striker hian September thla aṭangin Aizawl FC training a zawm dawn. MPL5-a Chanmari FC champion puitu Leonce Dodoz pawhin thla thar aṭang thoin training a zawm dawn a, Japanese striker leh Ivorian forward te hi MPL squad-ah ziahluh an ni rih lo ang.

I League season tharah hian foreigner paruk a neih theih tawh dawn a, heng zinga pahnih hi Asian player an ni tur a ni a, playing XI-ah panga an lut thei ang. Season liam ta kha chuan club pakhatah foreigner pali (Asian pakhat) a neih theih a, AFC foreign player pali Kingsley Obumneme, Kamo Stephane, Mahmoud Al Amna leh Alfred Kemah Jaryan te an kawl.

Season thar atan AFC hian Alfred bakah Kareem, Yugo leh Dodoz te an neih belh tawh a, player dang pahnih an neih belh leh chuan paruk an tling chiah ang.