Assam-ah Mizo fighter an che ṭha

All India Open MMA Tourna­ment, Assam-a neihah Mizo fighter-te an che ṭha a, gold pali, silver leh bronze pakhat ve ve lain a pumpuia ti ṭha pahnihna an ni.

Mizoram State MMA Association (MISMA) aiawh hian fighter pasarih an feh chhuak a, Luangmual tlangval Lalruatdika chu dam lohna avanga a inlan theih loh avangin fighter parukin inelna an hmachhawn.

August 19 leh 20-a Guwahati-a inelnaah hian State 10 aṭangin fighter 150-in inel­na hi a an hmachhawn a, a thlengtu Assam chu gold paruklain an tiṭha ber.

Official turin Samuel Lalrozama (Event com­missioner/Head referee), Lal-ṭhakima (R&J), Andrew Zonun­sanga (R&J), Rosie Lalduhawmi (cutman), Francis Lalfakzuala (manager) leh Lalremruata Hauhnar (team coach) te chu Mizoram aṭangin an kal ve bawk.

Joshua Hmangaihliana chuan kg 61 hnuailam inelnaah gold a la a, Vairengte tlangval hian semifinal-ah second 11 lek chhungin a khingpui a knockout!

Kg 65 hnuailam inelnaah Dengthanchhunga'n gold a la bawk a, Kulikawn tlangval hi final-ah unanimous decision-in a chak. 3rd MAP hmingti ṭha turin Ngurlianzuala Sailo chuan gold a la ve bawk.

Mizo nula inlan awm chhun Lalvenhimi'n gold la turin harsatna a tawk lo a, kg 52 hnuailam inelnaah technical knockout hmanga hnehna changin Khawhai nula hian second 44 bak hun a mamawh lo.

Gold la phak lo pahnih zingah PC Vanlalthuammawia'n kg 65 hnuailam inelnaah semifinal thlengin a khingpuite ngam ṭhin viau mah se final-ah unanimous decision-in a chak lo a, silver a la.

Dawrpui Vengthar tlangval Vanlal­chhuanga'n quarterfinal-ah pawh a khingpui technical knockout hmangin hneh thei mah se semifinal-ah erawh split decision hmangin a chak lo a, bronze-ah a lungawi a ṭul ta a ni.