Paris-ah Neymar a par vul nghal

Neymar-a'n Paris St-Ger­main tan Parc des Princes-ah a match hmasa ber a khel a, Barcelona forward hlui hian goal hnih a khung bakah assist vawi hnih nei bawkin a club thar hi Toulouse lakah 6-2 in hnehna a chanpui.

French Ligue 1-ah champion lai AS Monaco, PSG leh Saint-Etienne ten match thum an khelh tawhah hnehna an la chang fai vek a, point kua ṭheuh an hmu - goal difference nei ṭha ber PSG hi table hmahruaitu an ni rih.

Neymar-a show

Paris-a inkhelah rin loh takin Toulouse tan forward Max Gradel chuan minute 18-naah goal hmahruai a khung a, he goal hi PSG chhaih kawlhtu ang lek a ni. Edinson Cavani ball pet keeper-in a dan rawn per let chu Neymar-a'n minute 31-naah harsatna nei loin a sut a, chawlhlawk hmain PSG midfielder Adrien Rabiot chuan an hmahruaina goal a khung belh bawk.

Second half-ah Marco Verratti hnawhchhuah a ni a, player 10 an nih hnuah PSG hlauhawmna a nep phah chuang lo. Cavani, Javier Pastore leh Layvin Kurzawa te bakah Ney­mar-a'n hun tawp rualin a goal hnihna a khung a, an chak chiang hle. Barzil captain hian a club thar tan league match hnih a khelah goal thum a khung nghal der.

Kum 25 mi Neymar hian an goal hnuhnung ber khung tur hian Toulouse player pathum a paltlang hnuah goal hnaih tawh takah defender pahnih a bum leh zet a, chiaina nei miah loin goal a khung - pound maktaduai 200 man hian player ṭha fal bik a nihzia a lantir chiang hle.

Barcelona-ah khan Lionel Messi leh Luis Suarez te an awm avangin Neymar hi a lan­sarh tur angin a langsar tawk lo nia ngaih a ni. Mi tam takin a theihna tak pholang turin club dang zawm turin an duh. Ligue 1 club a zawm chhan hi sum um vang tia sawisel tawk awm mah se khelmual chhungah erawh khawvel player manto ber a nih a phuzia a lantir chho mek a, a lantir chhunzawm zel pawhin a rinawm.

Amaherawhchu, PSG-in Neymar an lakluh chhan tak pakhat chu Champions League nomawi an duh vang a ni. Season hmasa tih loh chu PSG hian league nomawi chawi turin harsatna an nei meuh lo a, an hlawhtlinna hi European football thleng phak nihtir an duh vangin player langsar lei nan sum uchuak takin an hmang - Neymar mawhphurhna leh a hmabak hi a la hautak chho dawn hle.

Eng nge an sawi?

Footballer manto ber Ney­mar chuan, "Parc des Princes-a bul

ṭan dan atan chuan duhthusam a ni. PSG ka zawm tirh aṭang khan nuam ka tiin ka hlim nghal hle a, club khelhdan phung thiam turin ka thawkrim nghal hle. Thlen san lamah chintawk a awm thei lo a, hmasawn zelna tur pawh ka la ngah hle, a bik takin ka taksa tih chak zual a ngai dawn," tiin tharum a mamawh belh thu a sawi.

Toulouse boss Pascal Dupraz pawhin Neymar thiamzia a hmuh hmaih lo, "Barcelona tana a khel kha ka hmu fo tawh a, a theihna san zia hi chu ka hre tawh. Ligue 1-ah a duhtawka a tal lai hmuh chu kan khingpui mah ni se hmuhnawm a tling, ani a rawn kal hian Ligue 1 a ti hlu sawt a, rahṭha tam tak a neih ka beisei," tiin a sawi.