Halep hnehtu Muguruza a champion

Wimbledon title a lak hnuah Garbine Muguruza chuan Cincinnati Open nomawi a chawi zui leh ta. Spain nula hian Pathianni zan khan Simona Halep chu 6-1, 6-0 in a sawp.

US Open inbuatsaihna tournament final-ah hian Muguruza hian hnehna chang turin minute 56 bak a mamawh lo. Muguruza hian semifinal-ah world number 1 Karolina Pliskova chu 6-3, 6-2 in a hneh tawh bawk a, tun inelna bikah chuan player khelṭha ber a ni.

Muguruza chuan, "Halep dinhmun angah ka indah chhin a, tawrh a har hle ang tih ka ring. Chutihrualin inel kan ni a, kei pawhin ranking sang bakah nomawi ka duh a ni. Kuminah ka khelh ṭha tluang ve hle a, vawin ang bawk hian US Open-ah pawh ka khelh chhuah theih ka beisei," tiin a sawi.

Romanian nula Halep hian nomawi chawi ni sela chuan world number 1 a ni thei dawn. Mahse, Halep hi a vannei tawk lo, player ṭha tak ni chungin a hun ṭha neih a bawhpelh fo a, inelna lian ber Grand Slam final vawi hnih a khelh tawhah pawh a chak lo zawkah a ṭang ve ve a ni.