Goal khung thiam Inter leh Milan

Pathianni zan Italian Serie A inkhelah AC Milan leh Inter Milan ten goal khung kawngah harsatna an tawk lo. Milan khaw club pahnih hian goal thum ve ve khungin season bul an ṭan fuh hle.

Nipui transfer laia player 11 zet lalut tawh Milan hian Crotone an lenchilh a, academy chhuak Patrick Cutrone bakah Franck Kessie leh Suso ten goal khat ṭeuh an khung. Milan hian tun hnai season li chhunga a vawi thum nan an league match hmasa berah hnehna an chang.

AC Milan boss Vincenzo Montella chuan, "Ka naute khelh dan leh an rilru puthmang khan minti lawm hle. Ngelnghet taka hnehna kan chan zel theih nan chuan inzir belh tur kan la ngah a, season tluana khelh ṭhat mar pat kan tum ang," a ti.

Season hmasa Serie A parukna Milan hi an player lakluh dan aṭang chuan nomawi kawltu Juventus elphak tura ngaih an ni. Europa League playoff lamah pawh result ṭha an nei tawh, tunkar Ningani zan hian Shkendija an lenchilh ang. Montella naute hian first leg-ah singa faia hnehna an chan tawh avangin group stage an khel phak ngei tura ngaih a ni.

Inkhel dangah Inter Milan pawhin manager thar Luciano Spalletti kaihhruaina hnuaiah season bul an ṭan fuh hle. San Siro-ah Mauro Icardi goal hnih leh Ivan Perisic-a goal khat hmangin anmahni el phak tura ngaih Fiorentina chu 3-0 in an sawp.

Inter hian season hmasa khan beisei an phak lo hle, an league match hnuhnung 12 zetah goal an chhuah vek. Kuminah erawh AS Roma manager hlui Spalletti-a'n tlarhnung a remphui nghal a, hmasawnna duhawm a ni.

Inter manager Spalletti chuan, "Bul ṭanna duhawm tak a ni. Perisic hian goal khung kawngah a ṭhiante a pui ṭhat bakah amah pawhin a pet goal thei, sawi hmaih thiang lo chu Icardi a ni bawk. Icardi hi chuan kan mamawh ang zat goal min khung sak mai ṭhin a ni," tiin a player goal khungtu pahnihte a fak uar hle.