Lampard-a’n Kante a dah sang

Chelsea manager Frank Lampard chuan N’Golo Kante a dah sang hle, a player enkawl lai chu khawvela a ṭha berte zinga mi a nih thu a sawi chhuak.

France international Kante hian Leicester City tana Premier League nomawi a chawi hnuah Chelsea a zawm. Blues tan hian league nomawi a chawi leh tawh a, an ram chu World Cup-ah hlawhtlinna a chanpui tawh bawk a ni.

Season kal laiah Kante hi hliamin a tibuai fo, a kerek leh tihrawl na vangin match ṭhenkhat a khel thei lo; inelna hrang hrangah match 22 chauh a la khel, a dam a nih phawt chuan khelmualah hmun pawimawh a chang.

Premier League season hnuhnung paliah khan Kante-a’n match 38 zinga 34 a khel tling vek, team tana a pawimawhzia chu a chiang hle.

Blues manager Lampard chuan, “Chelsea ka enkawl hma aṭang khan N’Golo Kante hi ka hre tawh. Ani nena kan thawkdun thei hi ka lawm, kuminah hliam vanga kan chhawr hnem thei lo erawh channa lian tak a ni.

“Khawvela player ṭha berte zinga mi a ni a, ani ang kan nei hi chu hmasawn duh keini tan chuan lawmna tur a ni. Hliamin ti buai ve deuh mah se tunah chuan inkhel turin a inpeih leh tawh,” tiin a sawi.

English manager Lampard-a’n a club hlui hi kuminah a vawi khat nan a enkawl a, league match an chawlh lailawk hma khan point 45 hmuin palina an ni mek; season thara Champions League khel phak turin an dinhmun a ṭha.