Premier League Club Bihchianna Norwich - Chris Sutton leh Teemu Pukki

Norwich City hi Premier League kal mekah table mawngphahah an awm a, season liam ta khan Championship-ah champion-in English football-a inelna sang ber khel turin an tling. Canaries hian season ṭantirh khan champion lai Manchester City chu game mawi tak khel chungin 3-2 in an hneh a, beisei pawh an nei sang hman. Amaherawhchu an squad panna a lang a, Covid-19 in a chhan a nih ngawt loh chuan season tharah an awm zel a rinawm ta lo.

June 17, 1902 khan Norwich City FC hi din ṭan a ni a, an match hmasa ber hi Newmarket Road-ah Harwich & Parkeston nen September 6, 1902 khan an khel. Club din ṭantirh hian Citizens tih a ni a, amaherawhchu kum 1907 khan Canaries tiin an thlak. Hetihlaia club Chairman hian Canary (Sava chi khat, eng pit piat) a vulh ṭhin vang a ni.

Norwich City FC a ṭhang zel a, kum 1935 khan tuna an stadium Carrow Road-ah hian an insawn. Canaries hian an mual thara an match hmasa berah West Ham United 4-3 in an hneh a, entu 29,779 zet an pungkhawm. Kum 100 liam ta khan club pual hla an nei tawh a, "On the Ball, City" tih chu kum 1980-a ziah niin tun thlenga la sak zingah a upa ber.

Canaries hi League Cup-ah vawi hnih an champion tawh a, league sang berah erawh Premier League ṭan kum khan pathumna an ni a. Hemi ṭum hian Chris Sutton chu an player pawimawh a ni a, English striker hian Norwich-ah season li awmin tun thlengin club tana goal khung tam ber a la ni reng. 

Christopher Roy Sutton hian 1994-95 season khan Premier League-ah Blackburn Rovers a champion pui a, hemi season hian Alan Shearer nen inkawpin 'SAS' tih hming lem pek an ni a, tun thlengin striker inkawp fuh zingah an chhiar tel. Kum 47 mi Sutton hi BBC-ah pundit (football expert) hna a thawk a, football khawvelah a mikhual lo hle.

Sutton hi March 10, 1973 khan Nottingham, England-ah a piang a, a naupan lai hian Norwich awmna Norfolk-ah a insawn. English naupang dang angin football a ngaina chho a, an sei lenna club Norwich a zawm. Kum 18 a nihin first team-ah a tel chho a, a lar zui nghal.

Premier League ṭan kumah hian Krismas laiin Norwich-in point riat ngawtin hma an hruai a, season a tawp meuh chuan Manchester United aiin point 12-in an hnufual ta zawk. Sutton chuan, "Champion tur kan ni a, champion thei kan ni. Chutihrualin a tak takah chuan champion turin kan inring lo. Kan club history thlir let pawhin division pahniha kal kual ṭhin kan ni a, inrintawkna kan nei lo. Kan khelh ṭhat ṭumah chuan eng team pawh hneh thei kan ni a, amaherawhchu kan tlarhnung a pawp ṭhin deuh," tiin champion tura an ṭhat tawk loh thu a sawi.

Sutton hi a inkhelhtirhin forward a ni a, Norwich academy-a a awm laiin centre midfielder pakhat a inhliam avangin Premier League a khelh ṭan pawh hian midfielder anga chhawr a ni ṭhin. Amaherawhchu, Sutton hian forward-a awm hi a duh ber a, a vanduaina erawh 90s chhoah tlarhma ṭha dang Alan Shearer, Ian Wright, Robbie Fowler, Les Ferdinand, Andy Cole, Teddy Sheringham leh Matt Le Tissier te an awm avangin ram tan khelhna hmun a chang tam tawk lo.

English forward hian Premier League-ah Blackburn a champion pui a, Celtic-ah kalin league nomawi vawi li lai chawipui mah se England tan vawi khat chauh a inlan. 1997–98 season khan Blackburn Rovers kawr nen Premier League golden boot a dawng a, hriat tel atana ṭha erawh Rovers-in Norwich aṭanga Sutton lak manah hian pound maktaduai 5 an seng a, a hun laia English player manto ber a ni.

Norwich ṭantu tan tun season Premier League an khelh theihna tura hruai thlengtu Teemu Eino Antero Pukki hi hriat ngei a ṭul. Finnish forward hian free transfer-in Brondby aṭangin Norwich hi a zawm a, season hmasa berah Championship Player of the Season leh Club Player of the Season a ni nghal.

Kum 30 mi Pukki hi lar chhuak har tia sawi a ni a, chutihrualin kum 2008 daih tawh khan Sevilla a zawm tawh avangin theihna sang tak a nei tih erawh a chiang. Mahse beisei anga a ṭhat chhuah mai loh avangin Schalke, Celtic leh Brondby-ah te a kal kual a, Danish club tih loah chuan rinrawl a ni pha lo.

Norwich-ah erawh Pukki hian season hmasa berah goal 29 a khung a, Premier League-ah pawh goal 11 a khung tawh. Nikum August thla khan Pukki hian Newcastle lamah hattrick a siam a, kum 26 leh ni 266 zet hnuah Norwich player zinga Premier League hattrick siam leh thei hmasa ber a ni.

Tunah erawh Pukki hmabak a ko, Covid-19 vanga buai mek Premier League khelh theih a nih chuan relegate lo turin match kua an khelh hmabak hman ṭangkai a ṭul ang.