Premier League leh Covid-19 Entu an awm lawk thei dawn lo - FA chairman
Football Association chairman Greg Clarke chuan football-in entu an neih thuai a rin ngam loh thu a sawi. Premier League leh Football League la khelh zawh lohte hi an khel zo a nih chuan entu awm loa khelh a ṭul dawn.
Premier League-in 2020-21 season khelh tumin ruahmanna an siam chho a, fan awm loa khelh theih dan an zawng. Clarke chuan, "A tak takah chuan thil thlen chhoh dan tur hi kan hre lo. Chutihrualin hun rei tak chhung social distancing hi kan zawm chhoh a ṭul dawn avangin football kalphung pawh thlak ve a ngai dawn," tiin Covid-19 vanga football kalhmang thlak a ṭul tur thu a sawi.
Football Association (FA) chairman chuan sawi chhunzawmin, "Entirna ṭha tak chu tun dinhmunah chuan entu awm a inkhelh theih a beiseiawm loh. Mipui hi football nunna hnar a ni a, inkhel entu hi tun hnai maiah chuan an awm dawn lo," a ti.
Coronavirus hian football-ah nghawng a nei lian a, an inkhelh theih miau loh avangin an sum hnar a tawp. Hei hian club budget thleng pawhin a nghawng dawn. Clarke chuan, "FA hnuaia executive team chuan Covid-19 in a nghawng turte an zirchiang a, kum li chhungin pound maktaduai 300 hial pawh kan hloh thei. Football club chauh ni loin FA hnuaia project hrang hrangah pawh nghawng a awm dawn," tiin a sawi.
Neutral ground leh a behbawm
May 1 khan Premier League club-te video conference hmangin meeting an nei a, neutral ground chu inelna an zawh theihna kawng awm chhun an ni tih an hrilh. Match khelh hmabak 92 khel zo turin a tam berah stadium 10 hman a ngai dawn a, Covid-19 lakah an fihlim em tih endik nan player leh staff 40,000 chuang an test a ngai dawn.
Premier League thuneitu rawtnaah hian club zawng zawng an lawm lo, neutral ground-a khelh duh lo pawl an awm. League-a 15-naa awm Brighton chu a pawm duh lo zinga mi an ni a, league inpumkhatna a chhiat a hlau.
BBC zirchianna aṭang chuan club paruk aṭanga pasarih velin neutral ground-a khelh hi an duh lo a, chutihrualin a duh ho hi season khar dana an duh danah an inlungrual chuang lo.
Club duh lo ho hi relegate hlau ho an ni a, tun dinhmuna hian 12-na Everton aṭanga an hnuai lama awm Newcastle United, Southampton, Brighton & Hove Albion, West Ham United, Watford, Bournemouth, Aston Villa leh Norwich City te chu tla thei dinhmunah an ding vek.
Prime minister Boris Johnson chuan tun Pathianni hian hna kalpui dan tur a puang dawn a, Premier League chuan hemi thu chhuak ngaichang hian karleh lamah meeting an nei ang. Premier League hi March 13 aṭang khan Covid-19 vangin chawlh rih a ni a, league khel zo turin match 92 khelh a la ngai a ni.