Hamilton-a'n ngaihdam a dil

Lewis Hamilton chuan Dutch Grand Prix tlan zawh taka a chet danah ngaihdam a dil. Mercedes driver hian inelna an neih laklawh laiin, a team chu radio kaltlangin a bia a, hetah hian a team te hi a rin zawh loh thu a hrilh.

Britain tlangval hian hnehna chan theihna remchang a nei, mahse intlansiak tawp dawn lamah safety car a rawn lut. A hnu lamah thil a danglam, intlansiak a khaihlak lai hian team lamin thutlukna an siam fuh a ngai ṭhin.

Season hmasa intlansiak hnuhnung berah pawh Mercedes aiin Red Bull lamin thutlukna an siam fuh zawk a, an champion phah. Kuminah pawh Red Bull chu team ṭha leh chungnung an ni chhunzawm mek.

World champion vawi sarih ni tawh Hamilton chuan, "Intlansiak kan neih zawh khan ka thu sawi kha a dik lo tih ka hre nghal a, ngaihdam pawh ka dil nghal. Tun hnua ka ngaihtuah let pawhin ka to dik lo tih hi ka pawm.

"Hnehna chan duhin ka la tuihal reng a, Dutch GP-ah khan beisei pawh ka nei sang hman hle. A tawp lama harsatna a lo thlen khan taksa mai bakah rilru thlengin a nghawng," tiin a thil tawn chu hrehawm a tih thu a sawi.

Hamilton hian 2007 khan F1 hi a luhchilh ṭan a, intlansiak vawi 103 teh meuhah hnehna chang tawhin Michael Schumacher nen nomawi (7 titles) nei hnem ber an ni, car intlansiakna sang berah hian season tin vawi khat tal hnehna an chang ziah.

Mahse, kuminah erawh Hamilton hian chak ni hmel a la hmu lo. A elpui Max Verstappen erawh intlansiak 15 zinga pangaah a chak thei thung. Lewis hian a record duhawm tak chhawm nun a duh a nih chuan thapui nena a beih a ngai.