Juve-in player ṭha chhuahtir tum lo

Juventus chuan hri leng vangin sum lamah harsatna tawk thei mah se an player ṭhate chhuahtir an tum lo, sporting director Fabio Paratici chuan a bik takin Paulo Dybala chu a theih anga rei chelh an tum thu a sawi.

Covid-19 vangin khawvel nunphung a khaihlak a, football khelh theih a nih loh avangin club tam tak chuan sum an hloh dawn. Nipui bazarah pawh season dang ai chuan sum leng vel a tlahniam hle in a rinawm.

Tun hnaiah Turin club hian Cristiano Ronaldo chu hralh an hreh lo tih thawm a awm, striker Gonzalo Higuain leh forward Paulo Dybala te pawh chhuahtir an hreh lo nia sawi a awm. 

Nipui bazar hmasa khan Dybala hi Manchester United leh Tottenham te nen nasa taka sawi zawm a lo ni tawh, tun season inelna hrang hranga goal 21 khung tawh Argentine forward hi an hralh dawn a nih chuan a man tam lai tak a ni ang.

Juve sporting director Fabio Paratici chuan, “Dybala chungchangah hian thil hriatthiam loh leh chiang lo a awm ṭhin, chiang taka ka sawi theih erawh chu ani hi chu a theih anga rei kawl kan duh,” a ti. Dybala hian 2022 thleng daih contract a nei mek.

Paratici-a chuan sawi zawmin, “Higuain hian tun season bakah kum khat dang daih contract a la nei a, ani pawh chhuahtir tumna a awm lo. A lakah rinna kan nghat ngam a, kum 

ṭha tak a hman mek hi nakkumah pawh a chhunzawm ngei kan beisei,” a ti.

Italian champion hian senior player Giorgio Chiellini leh Gianluigi Buffon te pawh contract thar ziahpui an tum thu a sawi bawk.

Serie A season kal laiah Juve hian Lazio lakah point khatin hma an hruai mek a, a zawna a vawi kua nan champion leh an tum. Tun kar aṭang hian Italian club ṭhenkhat chuan training an nei ṭan leh tawh ang.