Everton tan Rooney goal a tawk lo

Etihad Stadium-ah Wayne Rooney-a'n Premier League-a a goal 200-na chu Everton kawr ha chungin a khung a, player 10-a khel Manchester City-in minute riat chiah a awm tawh tihin Raheem Sterling hmangin an siphurh an sut.

Thawhṭanni zan inkhel nung takah hian City right back thar Kyle Walker chu minute 44-naah hnawhchhuah a ni a, minute 88-naah Toffees midfielder Morgan Schneiderlin chu hnawhchhuah a ni ve leh bawk.

Roo a la rintlak
Everton-in tun season league-ah match hnih khel tawhin goal hnih an khung tawh a, goal khungtu hi Wayne Rooney ve ve a ni.

Rooney hian minute 35-naah Dominic Calvert-Lewin pass chu a pet goal a, pound maktaduai 35 man keeper Ederson-a'n a kap karah a chhuah.

Kum 31 mi forward Rooney hi Blackburn leh Newcastle striker hlui Alan Shearer zawha Premier League-a goal 200 khung leh thei hmasa ber a ni a, Manchester United striker hlui hian a goal khung lawmin City ṭantute awmna lam hawiin thawm hre turin a kut chu a bengah a dah.

English striker hian United jersey hain Premier League-a a goal 50 leh 150-na chu Etihad Stadium-ah a khung tawh. Rooney-a'n Premier League-a goal a khung hmasak ber ṭumin kum 16 mi lek a ni a, October 2002 khan Arsenal lamah a khung.

Goal 200 khung tling tur hian Rooney-a'n league match 462 a khel a, a goal khung lai hi United-a amah kaihhruai ṭhintu Sir Alex Ferguson leh Jose Mourinho ten an hmunah an en.

Red card maw?
Manchester City defender Walker chu minute 44-naah yellow card pahnihna pek a ni a, referee Bobby Madley thu­tluk­naah Pep Guardiola a lawm lo hle.

Tottenham aṭanga City zawm­­tu Walker hian Everton forward Calvert-Lewin a veng a, referee hian a nghawk fuhah ngaiin yellow card pahnihna a pe.

Spanish manager chuan fourth official Michael Oliver lakah a lungawi loh thu nasa takin a thlen a, match official-te tih el nan kut a beng bawk. Inkhelh banah Pep hian Walker-a red card chungchanga zawhna a chhang duh lo.

Venhim hna
Everton-in result ṭha neih tumin pound maktaduai 140 an seng a, amaherawhchu cham­pion tuma pound maktaduai 215 sengtu City laka goal an khung hmasak avangin goal venhim hna an thawh a ṭul.

Toffees-in hun rei zawk City chhaih buai mah se an ṭangtluan thei lo a, Everton defender Mason Holgate chuan Raheem Sterling zawnah chiah tauh letin Liverpool player hlui hian chiang zetin a hlap lut nghal. Minute hnih chiah a awm tawh tihin Schneiderlin-a'n City forward Sergio Aguero a tlawh vangin yellow card pahnihna a hmu a, player 10 ve vea an khelh hnuah goal a luh belh lo.

City hi nikum khan Pep-a kaihhruaina hnuaiah a zawnin vawi ruk an chak a, match sarih­naah khualmualah Totten­ham Hotspurs hneh loin Etihad Stadium-ah Everton an mikhual zui a. Koeman-a hote hian defensive game khelin City lakah point khat hlu tak an hlawh chhuak a, Goodison Park-ah Toffees hian 4-0 in an sawp leh bawk. Spanish manager Pep-a hian league-ah chuan Koeman-a kaihhruai team a la hneh lo a, tun ṭumah pawh hian City hi team vannei zawk an ni.

Eng nge an sawi?
Everton boss Ronald Koe­man chuan, "Inkhel chu an thunun a, chance erawh an insiam tam lo. Keini pawhin counter attack hmangin chance ṭha kan nei ve tho," tiin an intluk tawka a ngaih thu a sawi.

Rooney fakin Dutch mana­ger Koeman chuan, "Rooney khelh dan hian min barakhaih lo. Everton-a a let hi châk takzet a, a khelh danah leh ka bula a awm hi kan lawm hle a ni," a ti.

Manchester City boss Pep Guardiola chuan, "Second half-ah player 10 leh 11 in kan khel a, Europa Legue khel thei team kan tum chung pawhin kan khel ṭha a ni. Point hnih kan hloh a, result kan duhin kan khel a, chak duh mah ila chance ṭha kan hlah avangin kan chak zo lo. Kan khelh dan uluk takin kan thlir let ang," tiin a sawi.

Hmabak
Pep Guardiola hote hian August 26 tlai dar 5:00 hian Bournemouth an tlawh ang. Everton-in August 27 zan dar 6:00 hian Stamford Bridge-ah Chelsea an khelhpui ang a, August 24 zan hian Europa League Playoff second leg khel turin Croatia-ah Hajduk Split an hmachhawn bawk ang.