MPL Kickoff-ah Reliance Sports General Manager

Mizoram Premier League Season 6 chu August 31 aṭangin ṭan a ni dawn a, August 25, Zirtawp zan hian Chanmari YMA Hall, Aizawlah Kick Off neih a ni ang. He hunah hian Chirag Tanna, Reliance Sports-a General Manager chu khuallian a ni ang.

MPL Kick Off-ah hian India rama footballer langsar ni ṭhin Baichung Bhutia bakah AIFF Vice President Larsing Ming-te pawh sawm an ni tawh a, tun ṭuma lokal tur hi Indian football-a mi pawimawh ber pawla ngaih Reliance Sports lam hotupa a ni.

Chirag Tanna hi I League club Pune FC hotupa a ni reng ṭhin a, tun hnaiah Indian Super League buaipuitu Reliance lamah a thawk ta a, ISL lama mi pawimawh ber zinga mi a ni. Amah hi AIFF League Committee-ah IMG Reliance aiawha telin member a ni mek a ni.

MPL Kick Off zanah hian club player-te coaching staff-te chu zan dar 6:45-a roll call neia kim vek tura ngen leh hriattir an ni a, zan dar 7:00-7:30 chhung MPL6 atana hriat tur pawimawh inhrilh hriatna hunah hman a ni ang.

Zan dar 8:00 atangin MPL6 Kick Off hi tan a ni ang a, club hruaitu zawng zawngte bakah MFA leh MFA Sub Committee hrang hrang member, District FA hruaitute, media leh sawm bikte tan tih a ni.

MPL Kick Off hunah hian MPL Handbook leh MPL Registration Booklet tlangzarh a ni ang.

Kum dang ang bawkin MPL Kick Off zan hian jersey pholanna hun hman a ni ang a, team captain-te'n oath taking an nei bawk ang a; zaithiamte an zai bawk ang.