Champions League playoff Zaninah Reds hma hun a chiang dawn
Zanin dar 12:15-ah Europe-a Liverpool dinhmun tur a chiang dawn - Reds hian Champions League playoff second leg-ah Hoffenheim an mikhual dawn a, Champions League group stage an khelh phak dawn leh dawn loh a chiang ang.
Hoffenheim khelmualah Reds-in 2-1 in hnehna an chang tawh a, Europe-a club te inelna sang ber khel turin goal khat aia tam chhuah loh a tawk. German club tan Champions League khel turin goal hnih tal khung a ngai thung - Captain Kevin Vogt chuan, "Goal hnih emaw a aia tam zawk kan khung theih lohna tur a awm lo," a ti a, inrintawkna nen Anfield an pan dawn.
Beiseina nen Reds
Liverpool-in Premier League-a an match hmasa berah Watford an inhnehtawkpui a, Champions League playoff an khel zui. Mikhual team tana chak harsatna hmun Hoffenheim-ah hnehna an chang a, kartawpah Crystal Palace nen league match an khelh chhunzawm.
Premier League-ah Reds-in Champions League an khel hah tih a chiang a, Anfield-a inkhelah harsa takin Palace chu 1-0 in an hneh hram. Inkhelh zawhah Jurgen Klopp-a'n, "Premier League-ah point ruk awm aṭangin point li chiah kan nei a, hei hi chinfel theih thil a ni. Champions League qualifier-ah chuan chetsual a thiang lo ang," tiin a sawi a, Hoffenheim laka chak tum ngei turin a naute a fuih.
Coutinho tel lohna
Barcelona nena sawi zawm hlawh mek Philippe Coutinho-a'n a hnungzang na avangin tun season-ah Reds tan khelmual a la rap lo a, zaninah pawh inlan tura beisei a ni lo - mipui ngaihdan erawh a dang tawh a, Reds hnena chhuah dilna thehluttu midfielder hi a hliam vang ai mahin a rilru puthmang dik loh vangin Klopp hian a la chhawr ngam lo niin a lang zawk.
Palace lakah Klopp-a'n a starting XI thlak danglamin Hoffenheim laka bul ṭan pha lo Andy Robertson, Ragnar Klavan, Joe Gomez, James Milner leh Daniel Sturridge te inkhel bul a ṭantir - hei hi Anfield-a second leg an khelh tur a ngaihtuah vang nia ngaih a ni.
Inlan tur
Liverpool tan Hoffenheim laka bul ṭan lo Dejan Lovren, Emre Can leh Mohamed Salah ten inkhel bul an ṭan tawh ngei a beiseiawm a, first leg-a free kick hmanga goal nalh tak khungtu Trent Alexander-Arnold chu Palace laka hahdamtir a nih hnuin inkhel bul ṭan tura beisei a ni bawk.
Klopp-a tana ngaihtuahna sen ngaihna tur chu left back a ni. Alberto Moreno chu Palace lakah hahchawlhtir a ni a, a aia luhtir Andy Robertson chuan a khel ṭha takzet. Hull City aṭanga Merseyside club pantu hian zaninah inkhel bul a rawn ṭan ta a nih pawhin a mak lo ang.
Hoffenheim an inringtawk
Liverpool-in kum 2010 hnuah vawi khat chiah Champions League an la khel a, an record duhawm lo tak hi thaichhiat an duh. Mahse, Hoffenheim-in awlsam taka an hun ṭha neih bawh pelh mai an tum bik lo. German club winger chhuanvawr Serge Gnabry chuan, "Anfield-a kan inkhel tur hi eng takin kan thlir a ni," a ti a, hnehna chan theih a inbeisei.
Hoffenheim boss Julian Nagelsmann-a'n Bundesliga-a an match hnuhnung berah Anfield-a an inkhel tur a thlir lawk a, Reds nen an intawn hmasaka player paruk ngawt bench-ah a dah. Chawlh hahdam tir zingah striker Sandro Wagner leh winger Serge Gnabry hi Reds tlarhnung tan ven uluk an ṭul ang.
3 - 0
Hoffenheim-in Bundesliga-a palina dinhmun an luah khan an club chanchina an thlen san ber ṭum a ni a, hnehna an chan chuan a vawi khat nan Champions League an khel dawn tihna a ni. Kartawp Bundesliga-ah Werder Bremen lakah 1-0 a hnehna an chan bawk avangin an inringtawk khawp ang.
Nagelsmann chuan, "Anfield-ah 2-0 a chak turin ruahmanna kan siam a, 3-0 a hnehna kan chan phei chuan a ropui lehzual ang," tiin a inringtawk hle.
Zanin Inkhel Tur
FC Copenhagen 12:15 AM Qarabag
Slavia Praha 12:15 AM APOEL
CSKA Moscow 12:15 AM Young Boys
Liverpool 12:15 AM Hoffenheim
FC Steaua Bucharest 12:15 AM Sporting Lisbon
First Leg Results
FC Copenhagen 0 - 1 Qarabag
Slavia Praha 0 - 2 APOEL
CSKA Moscow 1 - 0 Young Boys
Liverpool 2 - 1 Hoffenheim
FC Steaua Bucharest 0 - 0 Sporting Lisbon