Ramhlun North coach thar Samson

Mizoram Premier League Season 6 ṭan hmain Ramhlun North FC-in coach an thlak a, Lalruatliana Sailo-in (Tawia) banna a thehluh avangin a thlak nan coach Samson Ramengmawia an lalut.

Shillong Lajong captain hlui Samson-a hian kumin CYMA Football-ah player ni chungin Ramhlun South a champion pui a, football khelh a chawlhsan nghal bawk. Ramhlun South tlangval hian AIFF C Licence a nei a, player leh coach nichungin MPL club Zo United a enkawl tawh a, tun ṭumah erawh coach hna chauh a chelh tawh ang.

Mangṭha Tawia

Ramhlun North FC hian Lalruatliana Sailo kaihhruaina hnuaiah February 9, 2016 khan MPL5 Qualifier-ah Chhinga Veng chu 3-1 in an hneh a, champion chungin MPL khel turin an tling.

AFC B Licence baka NIS Diploma nei Tawia hnuaiah Ramhlun North-in I Day Football 2016 final an thleng a, Aizawl FC hneh thei dinhmuna an din hnuah hun tawp dawna an chetsual avangin nomawi an thlauh.

MPL5-ah Ramhlun North FC hi pasarihna an ni a, relegation playoff an khelh hnuah Mizorama football inelna sang ber khel turin an tling nawn.

Tun season-ah Ramhlun North-in Tawia hnuaiah bawk bul an ṭan a, MFA Super Cup-ah Republic VT FC (12-0) leh FC Ramthar, Durtlang (4-1) te hneh mah se penalty shootout-ah Aizawl FC Academy hneh loin last 16-ah an tla.

I Day Football-ah Ramhlun North-in Dinthar FC (4-1) a hnehin bul ṭan mah se AIFF Under 19 (1-1) an draw hnuah Aizawl FC (1-2) leh Bethlehem Vengthlang FC (0-2) a hneh loin group stage an paltlang zo lo.

I Day Football zawhah Tawia hian banna a thehlut a, Ramhlun North FC-in an pawm sak rualin MPL club hian Tawia chungah lawmthu an sawi a, a kal zelna turah duhsakna an hlan bawk.

Samson-a hun

Ramhlun North FC coach thar Samson-a hi a inkhelh hun laiin Mizo midfielder ṭha ber zinga mi a ni a, Lajong tana a captain a nih tawh bakah Nine Bullets Club, Tripura leh Mohammedan SC, Kolkata-ah pawh a lo khel tawh ṭhin.

Ramhlun South tlangval Samson-a chuan, "Player-te hi mahni lakkhawm a nih loh chuan a harsa ṭhin a, amaherawhchu tuna ka neih sa te hi training kan neih chinah chuan an fel a, club dang nena khaikhin pawhin an ṭha bawk. Hei vang hian Ramhlun North ka enkawl thei hi ka lawm a, inelna hmachhawn pawh a châkawm tawh hle," tiin Vanglaini a hrilh.

Ramhlun North hi MPL6-a an match hmasa berah I League champion Aizawl FC nen August 31, Ningani hian an inkhel dawn a, coach thar Samson-a bul ṭanna tur a awlsam dawn lo.