World number 1 thar Rafael Nadal

Rafael Nadal chu kum thum hnua a vawi khat nan ATP ranking tih chhuah thar berah chuan dinhmun chungnung berah a awm leh ta, ranking thar hi Thawhṭanni zan khan tihchhuah a ni a, Spain tlangval hi kum 2014 July thla hnua number 1 a nih lehna hmasa ber a ni.

Kum 31 mi Nadal hian a Grand Slam nomawi 15-na ni turin French Open-ah a champion a, tun hnaia hliam vanga inkhel thei lo mek Andy Murray lehpelin pakhatna hi a ni. Britain tlangval hi a khel bawr na vangin tournament hnuhnung pahnih Montreal leh Cincinnati Open lamah a hmel a inlan thei lo a, pahnihna dinhmun a la luah hram.

Mipa tennis lama thuneitu sang ATP president Chris Kermode chuan, "Rafa hian record duhawm tak tak a siam nual tawh a, tennis huang chhungah chuan player hlu bik leh entawn tlak a ni. A kum a tam deuh tawh a, hliam vanga buai fo bawk. Hetichung hian beidawng duh loa a beihna chu a tawpah a rawn lang chhuak leh ta a ni," tiin a sawi.

Tun season Australian Open leh Wimbledon title la tawh Roger Federer chuan pathumna dinhmun a luah. Swiss star hi kiu hliam vangin Cincinnati Open-ah a inlan thei lo, inlan ni sela chuan Murray hi a khum chiah ang, tun dinhmuna an inthlauhna chu point nga chiah a ni.

Tun hma lama world number 1 dinhmun chawlhkar 141 lai chelh tawhtu Nadal chuan, "Harsatna leh buaina tam tak ka paltlang hnuah number 1 ka ni leh thei hi ka lawm a, ka tan chuan a chung bera ka awm lehna hi ni chhinchhiah tlak bik a ni," tiin a sawi.

Season khat chhunga Grand Slam khelh tur pali zinga pathum an khel zo tawh a, a hnuhnung ber atan US Open chiah an hmabak tawh. Grand Slam vawi 12 champion tawh Novak Djokovic leh Stan Wawrinka te tan season a tawp tawh a - Murray, Marin Cilic leh Milos Raonic te chu hliam vangin an chawl mek bawk.

ATP rankings on August 21
# Player Ram Points
1 Rafael Nadal ESP 7,645
2 Andy Murray GBR 7,150
3 Roger Federer SUI 7,145
4 Stan Wawrinka SUI 5,690
5 Novak Djokovic SRB 5,325
6 Alexander Zverev GER 4,470
7 Marin Cilic CRO 4,155
8 Dominic Thiem AUT 4,030
9 Grigor Dimitrov BUL 3,710
10 Kei Nishikori JPN 3,195