AFC Cup Bengaluru-in North Korean club mikhual dawn

Zanin dar 7:00-ah Bengaluru FC chuan AFC Cup Inter-Zonal playoff semifinal an khel dawn a, North Korean club ṭha 4.25 SC an mikhual dawn. Sree Kan­teevera Stadium-a club pahnih inhmachhawn tur hi first leg a ni a, North Korea-ah Bengaluru hi an la zin leh dawn avangin an khelmualah goal chhuah loh a pawimawh dawn - inkhel hi AFC Cup facebook page-ah live a pek chhuah a ni ang.

I League aṭanga Indian Super League lama insawn Benga­luru tan ISL club an nih hnua an competitive match hma­sa ber a ni dawn a, group stage-a Bengaluru squad leh North Korean hmachhawn tur squad hi chu danglam tak an ni tawh - ISL draft-ah Indian player 14 ngawt a thar an lalut.

Mit fukna Gurpreet

Federation Cup champions Bengaluru-in kar hmasa lawkah India international goalkeeper Gurpreet Singh Sandhu an lakluh thu an puang a, Punjabi keeper hian kum khatah nuai 175 a hlawh dawn nia sawi a ni. Bangalore club hian Gurpreet lalut tur hian Norwegian club Stabaek FC hnenah transfer fee an pe a, Indian club zinga ram pawn club hnena player lei nana sum pe hmasa ber an ni.

Bangalore club-in heti taka sum insen an ngam miau avangin Gurpreet hi an rin nghal a rinawm a, Mizo tlangval Lalthuammawia Ralte chu bench lama hun hmang tura ngaih a ni - Gurpreet a chungah mipui mit a fu ang.

Mizo player

Bengaluru FC-ah Thuama bakah Mizo player Zohming­liana Ralte, Malsawmzuala leh Daniel Lalhlimpuia te an awm bawk. Chaltlang rawlthar Sawmtea hi Bengaluru FC-in ISL-a U21 player an chelh theih zinga an chelh pakhat zawk a ni a, Daniel-a hi AFC Cup ngaihtuah chungin an chelh thung.

ISL draft-ah an duhah Benga­luru FC an chiang a, season hmasa I League-a Aizawl FC an champion-na kawnga minute zawng zawng khel kimtu Zotea chu nuai 25-in an lalut. Ramhlun South tlangval hian, "Hmasawn zel turin he hmun hi ka pan a ni," tiin a sawi a, AFC Cup-ah pawh inkhel bul a ṭan beisei a ni.

Foreign player

Bengaluru-in nipui transfer bazar-ah Celta Vigo winger hlui Antonio Dovale, Barcelona B team midfielder hlui Dimas Delgado leh Australia tana vawi hnih inlan tawh midfielder Erik Paartalu te an lalut a, season hmasaa an defender Juanan Gonzalez an chelh bawk - foreign player te hi an inlan vek thei dawn.

Hetihlai hian Ashley West­wood a hunlai aṭang tawha Bengaluru ban rinawm John Johnson erawh chhungkaw thil avangin AFC Cup-ah a inlan thei dawn lo a, Middlesbrough defender hlui awm loh avangin Mizo tlangval Zotea Ralte chet ṭhat a pawimawh lehzual sawt dawn tihna a ni.

4.25 SC bihchianna

North Korean club, 4.25 tia hriat lar April 25 Sports Club tan tun season-a AFC Cup an khelh hi kum 25 hnua AFC Cup-a an inlan lehna hmasa ber a ni a, team ṭha an nihzia pholan nan an hmang nghal bawk. North Korean club hian group stage match li an khelhah goal 14 an khung tling der tawh - Bengaluru tlarhnungin hna an ngah dawn.

Bengaluru tan striker Kim Yu Song hi ven bik tur a ni dawn. Kum 22 mi striker hian match li-ah goal kua khung tawhin AFC Cup-ah top scorer a ni mek a, Erchim an hmachhawn ṭumin goal nga ngawt a khung. 4.25 chakna hnar tih hiala chhal ngam chu captain An Il Bom a ni. North Korea tana vawi kua inlana goal li khung thei defender hian a free kick leh corner pet thiam a hming ṭhat pui a, tun inelnaah pawh defender nichung siin goal hnih a khung tawh.

Zawhna chu

Mi tam tak thinlunga zawh­na lo awm chu Bengaluru khelh tur Inter-Zonal playoff semifinal hi eng ang chiah nge a nih? tih hi a ni a, dan thar a nih miau avangin zawhna a awm hi thil awm lo a ni hran lo. Group stage zawhah inelna hi zonal semifinals, zonal finals, inter-zonal semifinals leh inter-zonal playoff final-ah te ṭhen hran a ni.

Zonal semifinal-ah hian ASEAN leh West Asia aṭangin team pariat (group hmahruaitu pathum ve ve leh runner up tiṭha ber pakhat ve ve) an inhmachhawn a, semifinal a chak ve ve hi final-ah an inhmachhawn ang. ASEAN final a hnehna chang hi Inter Zonal playoff semifinal khel turin an tling a, West Asia-a hnehna chang erawh AFC Cup final-ah an lut tlang thung.

Chutichuan...

ASEAN-a champion-in Inter-zonal playoff semifinal an lut a, Central Asia, South Asia leh East Asia zone aṭanga group hmahruaitu ṭheuh an lut bawk. Bengaluru hi South Asia Zone aṭanga hmahruaitu niin Inter-zonal playoff semifinal hi an lut.

Team paliin semifinal match an khel ang a, hnehna chang pahnih hian Inter-zone playoff final an khel leh ang - hnehna an chan leh chuan AFC Cup final an lut dawn tihna a ni. Chumi awmzia chu Bengaluru hian 4.25 hi an hneh a nih chuan ASEAN Zone leh Central Asia aiawhin tuma chak zawk an tum leh ang a, chuta hnehna an chan leh chuan AFC Cup final an khel dawn tihna a ni.